شوبير: لا أزمة في وجود سيد عبد الحفيظ ضمن وفد الأهلي.. واتحاد الكرة سجل في مرماه
تحدث الإعلامي أحمد شوبير عن أزمة وفد الأهلي الأخيرة مع اتحاد الكرة، وعن وضع عدد من لاعبي الزمالك.
شوبير: لا أزمة في وجود سيد عبد الحفيظ.. واتحاد الكرة سجل في مرماه
وقال أحمد شوبير في تصريحات إذاعية: مفيش أي مشكلة في وجود سيد عبد الحفيظ ضمن الوفد اللي راح يسمع التسجيلات، الراجل عضو مجلس إدارة ومشرف على الكرة، يعني مش جاي من الشارع.. وكمان مفيش لوائح بتحدد مين يروح ومين لأ، فالدوشة اللي حصلت مالهاش لازمة.
وأضاف: الأزمة كبرت أكتر بعد تصريحات أوسكار، خاصة لما طلع مع إبراهيم عبدالجواد وقال محدش كلفه بتواجد حكام أجانب لمباراة الأهلي والزمالك، وبعدين رجع تاني وقال إنه فهم غلط.
وتابع: ده حق طبيعي للأهلي، لكن أنا شايف إن اتحاد الكرة سجل في مرماه هدف بسبب تصريحات أوسكار اللي ماكنتش موفقة.
وأكمل: اللي بيحصل كله عبارة عن عناد زيادة عن اللزوم، وإن اتحاد الكرة هو السبب في اللي وصلنله، لكن في النهاية ده كله مش هيغير نتيجة مباراة الأهلي وسيراميكا، وكمان في شكاوى كتير ضد التحكيم من أندية زي سموحة والأهلي والإسماعيلي وبيراميدز في الأسبوع ده بس.
شوبير: دائمًا أدافع عن الحراس.. والمهدي سليمان يقدم مستوى مميز مع الزمالك
وقال شوبير إنه دائمًا يدافع عن حراس المرمى، وأشاد بمستوى المهدي سليمان مع الزمالك.
وكشف أن بانزا يتدرب بشكل طبيعي لكنه يعاني من عدم الاحترافية، موضحا: وده عكس بيزيرا اللي قدر يكسب حب جمهور الزمالك بسرعة وبقى عنصر مهم في الفريق، رغم إنه بيخضع حاليًا لبرنامج تأهيلي بسبب إصابة في العضلة الخلفية، لكن ممكن يلحق مباراة بلوزداد.
