محمد طارق عضو مجلس الزمالك يكشف سر الفوز على الأهلي وحلم التتويج بكأس مصر لكرة السلة
تحدث محمد طارق عضو مجلس الإدارة بنادي الزمالك في حوار خاص لـ القاهرة 24 عن كواليس الفوز على الأهلي في نصف نهائي كأس مصر لكرة السلة، بالإضافة إلى ما حدث من تطور في المرحلة الماضية لفريق السلة بالقلعة البيضاء، وثقته في الفريق، ودور الجماهير في العودة القوية.
محمد طارق عضو مجلس الزمالك يكشف سر الفوز على الأهلي
■ في البداية.. كيف ترى هذا الفوز؟
منذ بداية الموسم كان عندي ثقة كبيرة في الفريق. بعد خطوات تنظيمية وفنية اتعملت، حسّيت إن في تغيير حقيقي بيحصل. الحمد لله الصورة بقت واضحة النهاردة إن الفريق قادر ينافس أي خصم ويقدم الأداء اللي شفناه قدام الأهلي.
■ هل توقعت الفوز على الأهلي؟
بصراحة نعم. كنت جاي وأنا متفائل جدًا. كان في حاجز نفسي قدام الأهلي والاتحاد في الفترة اللي فاتت، وبعد الفوز على الأهلي الفريق كسره.
■ وماذا عن مسار الفريق خلال الموسم؟
حتى في الدوري، البداية كانت قوية جدًا. حصل تراجع بسيط في إحدى المباريات، لكن الفوز على الأهلي ده حد ذاته أكد إن الزمالك “راجع من بعيد”.
■ الفريق اتعرض لنقد وكلام سلبي كبير في الفترة الأخيرة..ازاي تجاوزتوا المرحلة دي؟
في أول الموسم كان في كلام سلبي كتير عن فريق السلة، لكن في وقت قصير قدرنا نبني فريق يقدر يستمر ويقعد سنين يمثل النادي. الهدف من البداية كان تكوين قوام ثابت يقدر يخدم الزمالك 7 أو 8 سنوات وينافس على كل البطولات.
■ مستحقات اللاعبين.. وهل سيتم صرف مكافأة بعد الفوز على الأهلي والتأهل إلى النهائي؟
الحديث عن الماديات في الوقت الحالي غير مناسب، في لقطة لسة ناقصة بالتتويج، أمامنا مباراة قوية يوم الأحد في النهائي.. ولكن الزمالك سيعمل على توفير مستحقات اللاعبين.
■ هل ترى أن الزمالك يعود لمكانه الطبيعي في السلة؟
أكيد. الزمالك تاريخيًا من أكثر الأندية تتويجًا ببطولات السلة سواء دوري أو كأس، وده مكانه الطبيعي. ونتمنى الفترة الجاية نفرّح جمهورنا أكتر، خصوصًا إنهم بقالهم فترة ما شافوش فرحة كبيرة في ألعاب الصالات.
■ دائمًا تؤكد على دور الجماهير.. كيف تراهم؟
جمهور الزمالك مش مجرد جمهور. هو اللاعب اللي بيصنع الفارق جوه الملعب. زمان كان عندك نجوم زي حازم إمام ومحمود عبد الرازق شيكابالا، النهاردة نجم الزمالك الحقيقي هو الجمهور. هم يستحقوا مننا كتير، وبنعتذر لهم عن أي إخفاقات سابقة.
■ ما الرسالة الأهم في المرحلة المقبلة؟
أتمنى يكون في تلاحم من الجميع لمصلحة النادي. الهدف الأساسي هو إسعاد الناس، لأن كلنا بناخد حقوقنا، إلا الجمهور هو الوحيد اللي بيدي بس. الناس دي تستاهل الفرحة.
