حمادة طلبة: سبب مشاكل الأهلي صفقاته الكيدية.. والزمالك وجمهوره يستاهلوا تعظيم سلام
تحدث نجم الزمالك السابق وكرة القدم المصرية، حمادة طلبة عن الفريق الأول لكرة القدم بنادي الزمالك والأحداث الساخنة التي يمر بها الموسم الكروي الجاري 2025-26، ومواجهة الأهلي وبيراميدز المقبلة.
القمة مالهاش كبير.. وإن شاء الله نكسب الأهلي
قال حمادة طلبة في تصريحات لـ القاهرة 24: الزمالك ماشي بشكل كويس، وده راجع لروح اللاعبين ودعم الجمهور المستمر للفريق، رغم كل الظروف الصعبة اللي بيمر بيها الموسم ده، لكن اللعيبة رجالة، وكل واحد فيهم عايز يقدم حاجة للنادي وللجمهور، وإن شاء الله نكسب القمة قدام الأهلي، خاصة إنها ماتش مالوش توقعات مهما كانت ظروف الفريقين، وجمهور الزمالك يستاهل “تعظيم سلام”.
وأضاف نجم الزمالك ومنتخب مصر السابق: صحيح مستوى لاعبي الزمالك تراجع في آخر ماتشين، وده طبيعي بسبب ضغط المباريات، لكن إن شاء الله يقدروا يكملوا ويحققوا الفوز في الجاي، ونحصد الدوري والكونفدرالية.
وتابع حمادة طلبة: مباراة الأهلي وبيراميدز صعبة جدًا، لأن الفريقين بيتنافسوا على الدوري وكمان على التأهل لدوري أبطال إفريقيا، وصعب تتوقع نتيجتها، خصوصًا إن مستوى الأهلي متراجع الفترة الأخيرة لكنها مباراة صعبة على الفريقين.
طلبة يهاجم صفقات الأهلي: تعاقدات “كيدية” وزيز خان الزمالك
وأوضح حمادة طلبة: من أسباب مشاكل الأهلي إنه عمل صفقات “كيدية” لمجرد العند وخلاص، مش حسب احتياجات الفريق الفعلية، وزيزو أنا شايفه لاعب خان الفريق، وماقدرش قيمة العيش والملح مع زملائه، وكمان ماكانش واضح مع النادي أو جمهور الزمالك، ومستواه متراجع لأنه نيته مش كويسة فربنا مش هيوفق.
طلبة: أتمنى تقديم أداء مميز في كأس العالم
واختتم طلبة تصريحاته قائلًا: أتمنى منتخب مصر يقدم مستوى كويس في كأس العالم ونفرح بيه كلنا، خصوصًا بعد الأداء الجيد في ماتشات زي السعودية وإسبانيا، اللي ادتنا ثقة كبيرة، وإن شاء الله نشوف عدد أكبر من اللاعبين المميزين زي محمد صلاح ومرموش وغيرهم من النجوم اللي شرفونا في الكرة المصرية.
