كانوا بيلعبوا بالعربيات في زفة فرح.. شاب يستغيث من الاعتداء عليه إثر حادث على وصلة دهشور: 15 واحد ضربوني |خاص
استغاث شاب من تعرضه للاعتداء من جانب عدد من الأشخاص خلال سيرهم في زفة سيارات على طريق دهشور، حيث تعرض الشاب للضرب والسب من مجموعة منهم بعد اصطدام إحدى السيارات بسيارته.
شاب يستغيث من الاعتداء عليه في حادث على وصلة دهشور
وقال الشاب في تصريحات خاصة لـ القاهرة 24: كنت ماشي بعربيتي على طريق وصلة دهشور وكان فيه كذا عربية عاملين زفة فرح بالعربيات، وكانوا بيلعبوا بالعربيات لحد ماعربية شاب فيهم فضلت تزنق عليا وفرملت في نص الطريق وخبطت فيا.
وتابع: لما العربية خبطتني ودخلت في عربيتي نزلت أتفاهم معاهم لقيتهم بيشتموني من غير سبب، وفضلوا يضربوني على وشي وأنا مش عارف أعمل أي حاجة منهم ولا أتصرف إزاي لأني كنت مصدوم من اللي حصلي.
وأضاف: اضطريت أطلع موبايلي وأصورهم بسبب اللي بيعملوه معايا، واتفاجئت بيهم تاني بيضربوني وواحد بيقول في الفيديو إني ضربتهم.. إزاي وأنا لوحدي هقدر على 15 واحد!، وهلجأ لكل الإجراءات القانونية ضدهم وعايز حقي مش أكتر.
