حمزة نمرة عن أغاني الـ AI: مليارات المشاهدات لـ ماكينة.. وأقول لـ الموسيقيين في مصر والوطن العربي بلاش استسهال
أعرب المطرب حمزة نمرة عن إحباطه الشديد من التطور المتسارع لتقنيات الذكاء الاصطناعي في مجال الموسيقى، واصفًا ما يحدث حاليًا بالرعب، إذ يهدد هوية الفن ومستقبل الإبداع البشري.
وقال حمزة نمرة في فيديو عبر حسابه الرسمي بموقع إنستجرام: بسمع دلوقتي أغنية بصوت المغني أو المغنية واللي مقدمها الذكاء الاصطناعي، الموضوع بقى مرعب بشكل مش طبيعي وأنا خايف على مستقبل الموسيقى.
وواصل: المرعب في الموضوع إنه بقى ليهم مستمعين وأعداد كبيرة جدًا، يوصلوا للمليار واللي بيغني في الأصل مكنة، والمشكلة إن اللي بيسمعوا مش عارفين إن ده AI مش صوت بشري، دي حاجة محبطة، الناس مش عارفة تفرق.
كما أضاف: إحنا بقينا مثل الذي يتعلق بالأم اللي مش حقيقية ويتعلموا منها كل حاجة، بقينا مش عارفين نفرق بين الحقيقي والبشري والغير بشري، ده مديني إحباط كبير أوي.
واختتم: الفرق ما بينا إحنا كموسيقيين والذكاء الاصطناعي وجهة نظر، وأتمنى الموسيقيين في مصر والوطن العربي ياخدوا بالهم وبقولهم بلاش استسهال.
أعمال حمزة نمرة
وفي سياق آخر، يضع حمزة نمرة حاليًا اللمسات الأخيرة على ألبومه الغنائي الجديد، تمهيدًا لطرحه خلال الفترة المقبلة، بعد فترة من التحضيرات والعمل على اختيار الأغاني وتسجيلها، وعلم القاهرة 24 أن الألبوم يضم مجموعة متنوعة من الأغاني التي تحمل الطابع الحزين، مع حرصه في ذلك الألبوم على تقديم أفكار موسيقية مختلفة ترضي جمهوره في مصر والوطن العربي.
