عارفة عبد الرسول: أطالب من مديري الإنتاج قبض العمال باليوم.. بيستلفوا أكتر من قبضهم
طالبت الفنانة عارفة عبد الرسول من القائمين على العملية الإنتاجية بضرورة الرأفة بحال العمالة اليومية، حيث وصفت نظام الأجور الأسبوعي بالورطة التي تسببت في استدانة العمال، مؤكدة أن كرامة العامل تبدأ من حصوله على أجره في نهاية يومه كما كان المعتاد.
وكتبت عارفة عبد الرسول عبر حسابها الرسمي بموقع فيسبوك، معلقة: من أول ما بدأت طريق الاحتراف وأنا بعمل عقد بيتقسم على عدة دفعات كل فترة آخذ دفعة، والدفعة الأخيرة بعد عرض العمل الفني، كل الممثلين تأقلموا ونظموا نفسهم على كده.
وواصلت: العمالة كلها كانت بتقبض باليوم، يخلص يومه يقبض، قالك لا أنتوا هتقبضوا بالأسبوع، يبقى الواد شغال يا عيني يوم واحد وأول الأسبوع، يستنى لما الأسبوع يخلص يوم الخميس ويقبض اليوم بشيك ويستنى ليوم الأحد عشان يصرفه.
وأضافت: العيال يا عيني مش عارفة تمشي حياتها ويستروا نفسهم، السواق مش عارف يجيب بنزين والمساعد مش عارف يروح للعيال بالأكل، بشوف مهازل، بيقعدوا يستلفوا من بعض ولما يقبض يبقى مش عارف يسدد لأنه استلف أكتر من اللي جاي وكمان عامل حسابه إنه هيقعد كام يوم من غير فلوس، تسمع بقى خناقات ودوشة وورطات واقعين فيها.
واختتمت: رجاء لمديري الإنتاج، رجعوا العيال يقبضوا باليوم كاش زي ما كانوا حفاظًا على ماء الوجه وحفاظًا على ما تبقى من الإنسانية والرحمة.
