نزلت أجيب أدوية لبنتي رجعت لقيتها اتخطفت.. ننشر أقوال والد رضيعة الحسين في التحقيقات | خاص

يواصل القاهرة 24، نشر التحقيقات في قضية خطف رضيعة الحسين، التي وقعت منتصف الشهر الماضي، بمنطقة الجمالية بالقاهرة، وحوت الأوراق شهادة والد الرضيعة، وكيف خدعته المتهمة، وسبب مغادرته المستشفى واكتشافه خطف ابنته.

تحقيقات قضية رضيعة الحسين

واستمع رجال التحقيق إلى والد رضيعة الحسين، وجاءت أقواله بسؤاله: ما هي تفاصيل ما حدث؟

أجاب: اللي حصل إن مراتي كانت حامل، وأول امبارح روحنا مستشفى الحسين الجامعي علشان تولد بعملية قيصرية، وبعد الولادة تمت استلمنا الطفلة، ودخلوا مراتي على غرفة الإفاقة، ووالدتها كانت معاها، وبعدين دخلت قعدت معاهم شوية، وبعدين أخدت بعضي وروحت نمت.

وأضاف: جيت ثاني يوم الصبح على الساعة 11 صباحًا علشان أقعد معاها، ودخلت عليها العنبر اللي كانت قاعدة فيه، وكان في ست منقبة نقاب أسود قاعدة جانب مراتي وشايلة الطفل بإيديها، وبعدين أخدت منها البنت، وسألت مراتي هي مين الست المنقبة دي؟ قالتلي دي تقريبًا ست عندها حالة ولادة، بتولد في المستشفى، وبتساعدني في إنها تغير للبنت.

وتابع: بعدين مراتي ادتني روشتة طبية، وطلبت مني أروح أجيب أدوية للبنت المولودة، فقعدت معاهم عشر دقايق، وبعدين نزلت أجيب الأدوية من الصيدلية، ويدوب نزلت بعدها بأربع دقايق لقيت رقم بيتصل عليا، وحماتي بتقولّي: هو أنت أخدت البنت ونزلت بيها؟ فقولتلها: لا أنا سايبها معاكم.

وأكمل: رجعت ثاني ليهم، واكتشفنا إن الست المنقبة هي اللي أخدت الطفل وهربت بيها، فنزلت أدور عليها في كل حتة وملقتهاش، وبلغت الأمن، والشرطة جات وشافوا كاميرات المراقبة، شافوا فيها الست المنقبة وهي شايلة الطفل وخارجة بيها من المستشفى، وعملت محضر باللي حصل.