ابنة عبد الرحمن أبو زهرة: والدي وقف معايا في طلاقي وقالي تنازلي عن حقوقك واشتري دماغك.. وصرف عليا أنا وأولادي
تحدثت مي ابنة الفنان الكبير عبد الرحمن أبو زهرة عن والدها بعد دخوله في أزمة صحية كبيرة خلال الفترة الماضية، ومكوثه حاليًا في العناية المركزة بأحد المستشفيات، كاشفة العديد من المواقف التي شعرت بها بحب والدها الكبير لها.
وقالت ابنة عبد الرحمن أبو زهرة، في البودكاست الخاص بها افتح قلبك: بابا هادي ومكنش بيوجهنا بشكل مباشر كتير ودايمًا سايبنا نختار الحاجة اللي إحنا شايفنها، مش هقدر أنكر إن اختيارتنا مكنتش بتبقى أفضل حاجة وأقول لو كان قالنا متعملوش كده مش هقدر أكون حاجات كتير كانت اتغيرت لأنها كلها أقدار، ولكني مع أولادي بقيت أوجهم بشكل مباشر أكتر.
وأضافت ابنة عبد الرحمن أبو زهرة: بابا كان بيسيبنا على راحتنا ومكنش بيقول رأيه بشكل مباشر، كان بيعبر عن رأيه بشكل صامت، كان بيضحك ويهزر ولكنه عصبي وعرفت أحتاويه من وأنا صغيرة علشان كده كان يقولي أنا بحبك أكتر من إخواتك.
ابنة عبد الرحمن أبو زهرة: اتخطبت وأنا 14 سنة وبابا مكنش موافق
وعن موقفه من زواجها مبكرًا وطلاقها، فعلقت ابنة عبد الرحمن أبو زهرة قائلة: اتخطبت وأنا عندي 14 سنة وبابا اتصدم صدمة عمره وقعد أسبوع باصصلي وميكلمنيش لأنه ماكنش موافق، كان عايزني أكمل تعليمي في فرنسا، وقالي مش هتتخطبوا إلا بعد ما تخلصي الثانوية العامة والليسانس، وللأسف أقنعناه بحاجة غير كده واتجوزت بدري، ولكني وعدته بأني هخلص الليسانس والدكتوراه وفعلًا عملت كده، ولما خدت الدكتوراه حضني حضن عمري ما هنساه في حياتي.
وأردفت: حاول يقف معايا قبل طلاقي ويصلح ولما لقى إني مُصرة على الطلاق وقف معايا، ويوم الطلاق حصل شوية لغوشة فقالي اتنازلي عن كل حقوقك واخلصي بدل ما ندخل في قضية خلع واشتري دماغك، وبالفعل عملت كده وسافرت كندا وصرف عليا سنة أنا وأولادي بكل ما كنا نحتاجه.
واختتمت تصريحاتها قائلة: بابا محوش ومستثمرش وكان بيتبسط لما بيدي فلوسه للناس أولاده وأحفاده والناس اللي بتشتغل معاه، لما تعبت وجالي اكتئاب مكنش مصدق إن حصلي كده لغاية ما ولادي والدكاترة شرحوا له جالي وقعد معايا بدون ما يناقشني في أي حاجة.. إحنا ممتنين أنه قعد وعاش معانا الفترات دي.
