بتحبني حب مرضي.. محمود حجازي عن أزمته مع طليقته: كل ده تخطيط حماتي
تحدث الفنان محمود حجازي، عن أزمته مع طليقته رنا طارق، موضحًا أن الأزمة بدأت بسبب تركها نجلهما رفقة والدتها في الولايات المتحدة الأمريكية، ورفضها إحضاره ليعيش في مصر برفقة.
وقال محمود حجازي، في لقائه مع الإعلامية ياسمين عز، ببرنامجها كلام الناس: أنا من ساعة ما اتجوزت في أمريكا والجواز لحد دلوقتي متوثقش في مصر ولا في أمريكا، جواز إسلامي على يد شيخ في أمريكا، وأهلها مكانوش موافقين إننا نوثق الجواز ومكنتش فاهم ليه، ورجعت مصر لأني كنت متعاقد على مسلسلات، وقعدت معايا في مصر شهرين وعرفنا إنها حامل وكان نفسي أكوّن أسرة، وكنت حابب أريحها ولكن في الآخر إحنا بنعمل الصح وسمحت لها تسافر لأنها كانت عايزة تبقى مع أهلها، ورحت قعدت 5 شهور ونص في أمريكا وكنت برفض الشغل وحسبتها إن مش كل يوم هيجيلي ابن ولكن ممكن يجيلي مسلسل، وحضرت ولادة ابني وقعدت وعملت له شهادة ميلاد وباسبور.
وتابع محمود حجازي: حماتي شخصيتها صعبة أوي ومتحكمة وبنتها مش عارفة تختار حياتها، وحماتي هتطلع على المعاش ومعندهاش حاجة بتعملها في حياتها غير أنها بتأذيني دلوقتي، اعترضت وقلت أنا ليا كيان وهعمل إيه في أمريكا؟ ومحبتش الحياة هناك، ونزلت مصر لاقيتها سايبة ابني اللي عنده 4 شهور وجاية تحضر معايا الريد كاربت، وسايباه لوالدتها وهنا حصلي صدمة وبدأت الخلافات.
وأضاف محمود حجازي: مهنتي التمثيل وطبيعي بتعامل مع ولاد وبنات وهي بتحبني حب مرضي وبتحاول تدمر كل علاقاتي لغاية دلوقتي، هي عايز تدمر علاقتي بأي حد، هي بتحبني حب تملك خطير وطول الوقت عايزة تكلمني فيديو وتشوف أصحابي، وحصل تهديدات كتير من وقتها إنها هتاخد اللي ورايا واللي قدامي، وقالت علشان تأمن مستقبلنا كتبتلها نص البيت، ورفضت تيجي مصر وقالت عايزة النص التاني للبيت، وعرفت إني بتعامل مع ناس مش سهلة.
واختتم محمود حجازي: جابوا ابني وقالوا مش هتشوفه غير لما تعمل جواز جديد هنا، وأنا هنا قلت مش عايز أكمل ونخرج بالمعروف طالما حصل تعدي وتعدي لفظي، في بداية العلاقة أنا شفت منها كل خير معرفش اتحولت كده ليه، التحول اللي حصل ده بسبب خطة من عند والدتها لأنها ست متحكمة، أنا عملت محاضر بالتهديدات وكلمت كل الناس قطعت علاقتي بيهم وسوأت سمعتي بحاجات محصلتش، وكل الحاجات اللي حصلت كيدية علشان أشيل منع السفر أو تلوي دراعي.
