صفية العمري: الفن بقى عائلي.. ومبتعدة عنه علشان ما أهنش تاريخي
تحدثت الفنانة صفية العمري عن سبب غيابها عن الساحة الفنية خلال الفترة الأخيرة، مؤكدة أنها لا ترفض العمل، ولكن الأعمال التي تُعرض عليها لا تتناسب مع تاريخها الفني ومشوارها الطويل.
صفية العمري: الفن بقى عائلي
وقالت صفية العمري، في تصريحات لـ القاهرة 24، إنها بخير وعلى تواصل دائم مع جمهورها، مضيفة: مش بيتعرض عليّا أعمال الفترة دي، ولو حاجة اتعرضت بتكون قليلة ومتليقش بمشواري الفني، فمقدرش أهين تاريخي.
كما علّقت على التغيرات التي يشهدها الوسط الفني حاليًا، مشيرة إلى أن الفن أصبح يعتمد بشكل أكبر على العائلات الفنية، قائلة: الفن بقى عائلي أكتر، وكل فنان بيدخل ولاده يمثلوا معاه، وزمان مكناش كده.
صفية العمري: أصعب حاجة مريت بيها هو موت الأهل
وفي وقت سابق، تحدثت صفية العمري، عن أبنائها موضحة أنها لم تتمنَ دخولهم الوسط الفني، بجانب كشفها عن أصعب اللحظات والمواقف التي مرت بها.
وقالت صفية العمري، في تصريحات تليفزيونية: الإنسان دايمًا بتجيله لحظات إحباط وحياته بتتغير مع الظروف وبيكون فيه طلوع وهبوط، ولازم يبقى فيها إحباطات شوية ولازم يبقى فيها الرضا والتفاؤل ونقول يا رب، النهاردة في أحداث مدمرة والكون كله ملغبط، لكن ربنا حاطط فينا روح فيها تفاؤل ويا رب يرزقنا ويجدد حياتنا ونقول الحمد لله رب العالمين إننا بصحة جيدة ونحاول تاني ونجدد المقاومة، وده سر الرضا إنك تكون راضي من نفسك ومتحاولش تأذي حد وتتماشى مع أسلوب الحياة.
وواصلت صفية العمري: أصعب حاجة مريت بيها هو موت الأهل موت الأب والأم، هما دول اللي دايمًا مأثرين في حياتي وعاملين حاجة جوايا، في حنين واشتياق ودعوات كانت حلوة هي دي الحالة، في غربة الأولاد وبعوض ده في أولادي وأنا اتولد من بطن أمي أم، وبمارس أمومتي بكل المحبة والصداقة والتفاهم إني لازم أستوعب أولادي وأتفاهم معاهم وأعيش معاهم كل حاجة، إوعى تقسى على ابنك.
