زيزو: الجمهور سر استمرار الزمالك في المنافسة.. وعلاقتي جيدة بالعديد من لاعبي الفريق الأبيض
علق أحمد سيد زيزو لاعب النادي الأهلي على الانتقادات التي توجه له عبر وسائل الإعلام من بعض النقاد الرياضيين والمحللين، ومدى تأثره بتلك الانتقادات.
تصريحات زيزو مع سيف زاهر
وفي تصريحات مع الإعلامي سيف زاهر قال زيزو: مش بفتح التليفزيون ومش بتابع إيه بيتقال في القنوات.. مرة سلمت على نجم قديم قابلته في مكان.. وبعدها صاحبي قالي سلمت عليه ليه؟ ده بيهاجمك في البرامج.
وواصل زيزو: حاسس إن أنا مقصر مع ولادي مش بقعد معاهم كتير.. لأن معظم اليوم بكون في التمرين، والمحيطين بي أذكياء ولا يمكن أن يوصلوا لي ما يقال عني بشكل سلبي في الإعلام أو السوشيال ميديا.
وعن كواليس رحيله عن الزمالك والشكاوى المتبادلة بينه وبين النادي قال زيزو: فيه ناس مسئولة مش مستوعبة حجم المسئولية بتاعتهم.. ما ينفعش تسيب لاعب من نجوم الفريق يدخل آخر موسم في عقده بدون ما تتفق معاه على التجديد أو تبيعه، ومعنديش معلومة الشكوى بتاعتي ضد الزمالك وصلت لفين الموضوع ده مش أنا المسئول عن متابعته.
ونفى زيزو وجود أي خلافات أو أزمات بينه وبين زميله في الأهلي إمام عاشور، وفي هذا الصدد قال: الناس بتقول كده علشان دي أكتر حاجة ماشية.
وتطرق زيزو في حديثه إلى جماهير الزمالك قائلا: جمهور الزمالك السبب إن الفريق استمر في المنافسة.. جمهور الزمالك يمثل 80% من قوة الفريق الأبيض.. معندكش حاجة تانية بعدها.. الـ 20% إمكانيات فردية للاعبين.
وعن دور جماهير الأهلي وتأثيرها على الفريق قائلا: ممكن نفس النسب لكن باقي النسبة في الأهلي دي إمكانيات النادي موجودة، علشان كده هتلاقي الأهلي أكثر فريق بيتوج بالبطولات وأكثر فريق بيحقق بطولات.. واللي حصل ده استثناء مش قاعدة.
وتحدث زيزو علاقته بلاعبي الزمالك بعد رحيله عن الفريق الأبيض قائلا: علاقتي جيدة بعدد من لاعبي الزمالك حتى بعد رحيلي عن الفريق ومنهم أحمد فتوح.. فتوح لاعب راجل ميخسرش صحابه خوفا إنه يتشتم.. وعلاقي جيدة بكل نجوم الزمالك ومحمد إسماعيل كان بيحلقلي شعري في المنتخب.
وعن تطلعاته مع منتخب مصر قبل المشاركة في كأس العالم وتطلعات الجهاز الفني بقيادة التوأم حسام وإبراهيم حسن قال زيزو: حسام حسن كان عاوز يكسب إسبانيا في أرضها.. ومش مستغرب أن حسام حسن يكون رايح كأس العالم وهدفه الفوز بالبطولة، وفي البطولة الماضية كان هدفنا الفوز بأمم إفريقيا.
