بطلة “عائشة لا تستطيع الطيران” تكشف تفاصيل أزمتها بالعمل: المخرج مطلعني مش لابسة وده مش حقيقي
كشفت عارضة الأزياء السودانية أشاي أيوم، تفاصيل أزمة مشاركتها في فيلم “عائشة لا تستطيع الطيران”، موضحة أن مخرج العمل لم يفٍ بوعوده في اتفاقه حول مشاهد العمل.
وقالت أشاي أيوم، في تصريح خاص لـ القاهرة 24، إنها لم تكن شاهدت الفيلم منذ عام وقت عرضه، موضحة أنها شاهدته الفترة الماضية للمرة الأولى وصُدمت من ما شاهدته: فيه واحد من معارفي بعتلي لينك الفيلم واتفرجت عليه من أسبوع مش من سنة وقت نزوله، والمنتجة والمخرج أصحابي وفي بينا احترام، ولما قالوا هيتعرض في مهرجان كان اتبسطت واتضايقت جدًا بصراحة لما اتفرجت عليه.
وأضافت: المشهد حصل فيه تعديلات كتير بصراحة، والتعديلات دي مكانتش اتفاقنا كان المفروض يكون حديث عادي ويمسك إيدي ووسطي ونركب ميكروباص وبعدين هيقرب مني وهيجي شباب سودانيين يطلقوا النار وأنا اللي هتصاب وهتعالج، وقبل التصوير بساعات كلمني أحد مسؤول من الفيلم كلمني قالي حصل تعديلات في الأوردر والمخرج عدل المشاهد، وحاولت أعرف إيه هي ولكن رفضوا وقالوا لما تيجي اللوكيشن، وقبل ما أدخل اللوكيشن بـ 10 دقائق المخرج طمني وأن المشهد مش خطير وقالوا هيقصوا وشي لأني خايفة وقلت مش هصور المشهد ده ومكنتش اتوقع أنه هيعمل كده، ووثقت فيه ولكن أنا صورت المشهد لوحدي في الميكروباص.
وأكملت: حذفوا مشهد وهو ماسك إيدي ونازلين من الميكروباص وهو واخدني للممرضة، ظاظا هو رابر مينفعش يظهر في المشهد عشان سمعته، وده تحليلي أنا، أنا بسأل نفسي أسئلة كتير، ووحدة من صحباتي كلمتني وقالتلي إيه اللي أنتي مصوراه ده، ومعرفتش أعبر بأي طريقة وأنا بتفرج عليه وبسأل نفسي إيه موقف عائلتي بعد اللي حصل ده، وليه التيشيرت بتاعي مش موجود وأنا كنت لابسة في المشهد؟
