بسبب تليف الفيلر الدائم.. غادة عادل تتحدث عن خضوعها لعملية التجميل: عملت حاجة واحدة بوظتلي حياتي
كشفت الفنانة غادة عادل، عن تفاصيل خضوعها لعملية تجميل إثر خضوعها لـ حقن فيلر دائم منذ عام 2007، بعدما أٌصيبت بضرر بسبب تليف الفيلر.
وقالت غادة عادل، في لقائها بـ برنامج صاحبة السعادة: الفيلر ده أوحش حاجة في الدنيا، أنا زمان سنة 2007 كنت بعمل مسلسل قلب ميت مع شريف منير، وكنت خاسة أوي فـ الاستايلست قالتلي ننفخ شوية في الخدود ورحت وحقنت فيلر وحسيت أن عندي نضارة والموضوع خلص.
وتابعت: وبعدين قعدت فترة ألاقي حاجة طالعة في وشي فوق وبروح لدكاترة مش عارفين، رحت إنجلترا الدكتور سألني أنتي حاقنة فيلر؟، وكان عدى 7 سنين وأنا مش فاكرة لأني كنت فاكرة أنه بيروح بعد 6 شهور وبقيت أحلف له أني مش حاقنة، وعملي أشعة ووراني الفيلر الدائم وأنا مكنتش أعرف، والدكتور قالي يا نعمل عملية ونشيله يا نزقه وزقه وقلت أهو تخت أو خسيت عندي خدود، لغاية ما حصل تليف وبدأ يكبر ويتحرك من مكانه.
وأضافت: عملت حاجة واحدة بوظت حياتي، ومع الوقت والزمن انتهى خالص، وربنا ألهمني أني قابلت دكتور عنده ضمير فقالي هشيلهم ولكن لازم أعملك شد وجه، والحمد لله أن متغيرش حاجة في شكلي.
