نادر نور: أغنية لو على قلبي علمتني الصبر وحلمت بـ إليسا بتغني لو تعرفوه.. والمزيكا أخطر أنواع الفن
تحدث الملحن نادر نور، عن أشهر أعماله أغنية لو على قلبي، لـ الفنان اللبناني فضل شاكر، وكواليس أغنية لو تعرفوه للفنانة اللبنانية إليسا، موضحًا أن المزيكا تستطيع أن تؤثر في المتلقي بشكل كبير بسبب سرعة انتشارها.
وقال نادر نور، في لقائه مع الإعلامية ياسمين عز، في برنامجها كلام الناس: أغنية لو على قلبي عذبتني قعدت 4 سنين، وعلمتني الصبر وراحت لـ شعراء كتير ومتكتبتش، وبدأت أسمع الأغنية لـ مطربين وكل واحد كان ليه تعليق أنها طويلة ونقص من الكلام أو اللحن، لغاية ما وصلت لمرحلة أن الأغنية دي وحشة، لغاية ما قعدت مع فضل شاكر وسمع أغاني كتير معجبتهوش لغاية ما سمع لو على قلبي، وبدأ يغنيها معايا وقرر ياخدها وفضل كان جاي من نجاح كبير جدًا.
وتابع نادر نور: أنا مكنتش مصدق وقلت معقولة يشتري أي حاجة؟، بعد شهرين كلمني من تونس وتفاجئت أنه سجل الأغنية وهينزلها لوحدها بـ كليب، لاقيت نفسي عايز أقوله أنت ليه بتعمل كده؟، قولتله راجع قرارك وفرحت جدًا لما نزلت وكسرت الدنيا، ربنا بعتلي بيها رسالة اسمها الصبر.
الملحن نادر نور عن أغنية لو تعرفوه: حلمت بـ إليسا بتغنيها
أما عن كواليس أغنية لو تعرفوه، فعلق نادر نور: جملة وفكروه فاتني وبستناه وكمان بقى عرفوه من فات حبيبه تاه، من أغنية لو تعرفوه، حلمت بـ إليسا بتغنيها، وصحيت كتبتها ولحنتها، والشاعر نادر عبد الله غير كلماتها.
وأضاف: المزيكا أخطر أنواع الفن لأنها بتنتشر بسرعة جدًا، وهي أكتر حاجة بتأثر في الناس من غير ما تشوفيها، والملحن معندوش أي آلة يبدأ منها، ممكن كلمات حزينة بتتلحن رقص زي أغنية أشوف فيك يوم بتاعة عبد الفتاح الجريني، كنت بستغرب أوي أنها بتشتغل في أماكن سهر كتير الناس من كتر ما هي حزينة بتقوم ترقص.
