طارق العريان عن استمرار سلسلة ولاد رزق: الناس بتحبه ودايمًا مستنياه كأنه مسلسل.. واستثمار النجاح مش عيب
تحدث المخرج طارق العريان، عن الجزء الرابع من فيلم ولاد رزق، موضحًا أنه لم يستقر حتى الآن على باقي أبطال العمل غير الفنان أحمد مالك، الذي سيقدم شخصية رضا التي قدمها الفنان أحمد عز، في الأجزاء الثلاثة الماضية، بجانب الكشف عن سبب استمرار سلسلة العمل.
وقال طارق العريان، في تصريحات تليفزيونية: أحمد مالك هيقدم شخصية رضا اللي قدمها أحمد عز، ولكن لسه مختارتش باقي الأبطال لأن الفيلم لسه في مرحلة الكتابة، ولسه بنشوف أحجام الشخصيات، مش بأيدي أقول أني أجيب عصام عمر إلا لما يكون الدور كبير، فمش قادر أحدد إلا لما يتكتب كله.
وعن سبب استمرار سلسلة ولاد رزق، فعلق طارق العريان: وجهة نظري النهاردة أن مش عيب كلمة استثمار النجاح، خاصة لما تكون بتعمل فيلم كويس مش بتحلبه، الناس حابة ولاد رزق أوي ودايمًا مستنينه كأنه مسلسل وحلقات، حتى لو رجعنا للوراء 25 سنة الناس مهتمة، الناس اتعلقت بالشخصيات ولازم تعمل حاجة حلوة وإلا مش هتكمل.
فيلم ولاد رزق 3
يُشار إلى أن فيلم ولاد رزق 3 عُرض عام 2024، وحقق نجاحًا كبيرًا وقت طرحه في دور السينما، متصدرًا إيرادات شباك التذاكر ومتجاوزًا العديد من الأفلام المعروضة في وقتها.
