طارق علاء: محمد صلاح يتحدث معنا في كل التفاصيل.. ونسعى لصدارة المجموعة
أبدى طارق علاء لاعب منتخب مصر سعادته بمشاهدته للجماهير المصرية تملأ استاد لومن فيلد في مواجهة بلجيكا، ضمن مواجهات الجولة الأولى من المجموعة السابعة ببطولة كأس العالم 2026.
تصريحات طارق علاء
وقال طارق علاء في تصريحات للصحفيين بحضور مراسل القاهرة 24 عقب المباراة: “نقطة كويسة مش وحشة، بس إحنا كنا جايين الماتش إننا ناخد تلات نقط، بس الحمد لله على النقطة، وإن شاء الله الماتشات الجاية نقدر نحسمها ونصعد بدري إن شاء الله”.
وأضاف: “فتوح كويس الحمد لله، مفيش أي إصابات في الفرقة، محمد صلاح طبعا بيتكلم مع كل واحد فينا بخصوص التفاصيل الفنية”.
وتابع: “شعوري كشخص موجود في كأس العالم؟، طبعا عايز أشارك وأعمل حاجة مع منتخب مصر”.
وأوضح: “كابتن حسام نزل بين الشوطين كلمنا إننا لازم نكسب ونجيب التاني والتالت، بس الحمد لله فرص كتير ضاعت ومكنش معانا توفيق إننا نجيب التاني والتالت واتعادلنا، بس الحمد لله دي نتيجة بتاعة ربنا”.
وواصل: أنا عارف أن الشعب المصري في ضهرنا، واتخضيت انهاردة لما دخلت الاستاد لقيت كلهم مصريين الحمد لله، فإحنا كان نفسنا نفرحهم بس هما أكيد فرحانين بالتعادل، وإن شاء الله اللي جاي أحسن".
حول تأثير الأجواء الحارة وتوقيت المباراة: “لا مأثرش، لأننا بنتمرن بقالنا كتير في نفس ميعاد الماتش، وفي نفس الأجواء، كابتن حسام من الساعة 12 بنبدأ التمرين وبنخلص الساعة 2، وإحنا نزلنا الماتش الحمد لله مكنش فيه أي حاجة”.
