اتحرش بيا وسرق جهازي.. فتاة تستغيث من شقيقها بادعاء إدمانه المخدرات وسرقتها في بالدقهلية
استغاثت فتاة تدعى ندى إمام من شقيقها وذلك عبر حسابها الشخصي على مواقع التواصل الاجتماعي، حيث تضمنت الاستغاثة تعاطي شقيقها المواد المخدرة وسرقة جهازها والتعدي عليها، وذلك بعد وفاة والدها في مدينة طلخا، حيث حررت ضده محضر حمل رقم 8277 لسنة 2026 جنح طلخا.
فتاة تستغيث من شقيقها بادعاء إدمانه المخدرات وسرقتها في الدقهلية
وكتبت الفتاة خلال المنشور المدعوم بفيديو: دي أول مرة ف حياتي أكتب حاجة هنا عن حياتي الشخصية، ويمكن معرفش أصيغ الكلام أو أرتبه كويس، أنا تم التحرش بيا من أخويا في سنة 2017 كنت وقتها في ثانوية عامة، ومن الصدمة فضلت شهر لا بتكلم ولا بخرج من البيت لمدرسة أو دروس، واتفصلت من المدرسة وقتها بسبب الغياب والنتيجة إني سقطت في مادتين، وأنا مقدرتش أتكلم وقتها ولا كنت عارفة أعمل إيه أو أقول إيه، ولأنه كان عارف اللي عمله كان كل شوية ييجي يسألني مالك حد زعلك أو أنا زعلتك عشان يبعد الشبهة عنه قدام بابا وماما.
وادّعت: وللأسف أنا كملت في السكوت وقتها فترة كبيرة وعشان سكت اتجرأ عليا أكتر وضربني في مرة بعد واقعة التحرش بـ 6 شهور، وقتها قلت لماما اللي حصل ولما واجهته قدامها اتهمني بحاجات بشعة، وأنا غلطت إني فضلت ساكتة السنين دي كلها فأنا بقدم بلاغ رسمي بواقعة التحرش.
وزعمت: حاليًا هو مدمن آيس وبودرة ومن بعد وفاة بابا وهو قاعد في البيت وماما اللي بتصرف عليه وقبل العيد بأسبوع كان ف اوضتين في البيت مقفولين بمفتاح فيهم جهازي في واحدة منهم عرف يسرق مفتاحها من ورانا والتانية كسر كالون الأوضة وسرق كل اللي فيها في وقت كنت أنا وماما بره البيت، سارق حاجات بقيمة 250 ألف جنيه وكان عامل كل ده وكان قاعد واكل شارب معانا وماما هي اللي اكتشفت السرقة، وأول ما اكتشفتها جري وهرب وماما عملت بلاغ بالسرقة، وكل يوم كان بيبعتلنا حد من قرايبنا واتفقنا إننا هنعالجه وبالفعل ماما راحت معاه لحد المصحة وأول ما وصلوا سابها وهرب واختفى من المكان، وبالمناسبة دي مش أول مرة نعالجه دخل قبل كده مصحة خاصة في آخر 2023 وصرفنا فوق الـ 100 ألف على علاجه وطلع ورجع تاني للآيس وكل أنواع المخدرات.
وأكملت: ولما قلنا للناس اللي اتدخلت إنه مش هيدخل البيت تاني حصل زي ما في الفيديو كل يوم بييجي تحت البيت يتهجم علينا بأبشع الكلام وبيبقى هيكسر البوابة علينا، وأنا وماما في البيت لوحدنا والفيديو ده كان الساعة 4 انهاردة.
من جانبها تفحص الأجهزة الأمنية تفاصيل الواقعة، للوقوف على جميع ملابساتها واتخاذ جميع الإجراءات القانونية حيال الواقعة.
