علي الشريعي يهاجم حلمي عبد الباقي: خدعتنا
هاجم علي الشريعي، عضو مجلس نقابة المهن الموسيقية، برئاسة الفنان مصطفى كامل، الفنان حلمي عبد الباقي، وكيل النقابة سابقًا، بعد اتهامات عبد الباقي لأعضاء المجلس خلال الفترة الأخيرة عقب شطبه.
وقال علي الشريعي، في فيديو عبر حسابه بـ فيس بوك: أنت بتتكلم على ناس مشيت ومخدناش عليها أحكام ما الناس دي أنت اللي ماضي عليها ولا أنت ناسي؟، ما أنت اللي ماضي على الدكتور اللي اتحول للتحقيق، دلوقتي كله حلو وإحنا اللي بقينا حرامية؟.
وردًا على حديث حلمي عبد الباقي، عن عدم زيادة معاشات الموسيقيين بالرغم من كبر أرصدة النقابة، فعلق علي الشريعي: معاشات إيه اللي بتتكلم عليها حضرتك؟ مرفعتهاش ليه من 2019 لما كنت في المجلس القديم؟، لغاية 2026 كنت موجود متكلمتش ليه وجاي تتكلم دلوقتي؟، الـ 10% اللي بتتكلم عليها بتاعة المناديب اللي مبتاخدش راتب؟ عمرنا شفنا موظف بيشتغل من غير راتب؟، جاي لواحد غلبان متمرط في الفلاحين وهنا وهنا علشان ياخد 10% من الفلوس اللي بيلمها تقول هبلغ الضرائب، ما النقابة بتدفع ضرائب لكل الناس.
وأضاف: هما دول أعضاء الجمعية العمومية الغلابة اللي أنت بتحافظ عليهم؟ ده الناس دي مبتاخدش رواتب وبناقش أننا نعملهم رواتب، ولا أنت علشان المصلحة مقضيتش مع اللي أنت طلبت منهم فلوس قدامي جاي دلوقتي تقول علينا كده؟، إحنا عمرنا ما لعبنا قمار ولا ركبنا طرابيزة على طرابيزة، ولا أم فلان ولا أم علان، إحنا كلنا بشوات وأنت عارف كده، دلوقتي بقينا كلنا وحشين؟.
