إبراهيم حسن: حمدي فتحي يغيب عن مباراة إيران.. ومباراتنا أمام نيوزيلندا شهدت أخطاءً تحكيمية
تحدث إبراهيم حسن مدير منتخب مصر عن كواليس فوز الفراعنة على منتخب نيوزيلندا صباح أمس الاثنين، في لقاء الجولة الثانية لدور المجموعات لبطولة كأس العالم 2026، مشيرًا إلى أن بعثة منتخب مصر وصلتها أنباء تفيد بإشادة الرئيس الأمريكي دونالد ترامب بأداء منتخب مصر في كأس العالم.
كواليس غرفة ملابس منتخب مصر بين شوطي مباراة نيوزيلندا
وفي تصريحات تليفزيونية كشف إبراهيم حسن كواليس ما دار داخل غرفة ملابس منتخب مصر بين شوطي مباراة نيوزيلندا قائلا: حصل تغيير في المراكز في الشوط الثاني ودي كلها مع رؤية حسام لأنه بيطور من نفسه بصورة كبيرة وبيبتكر حاجات كتير، حتى محمدد صلاح بيوظفه في مكان تاني وبيجدد.
وأضاف: الحمد لله اللي اتقال بين الشوطين لازم يتنفذ، وقولنا للعيبة لازم تنفذوا الكلام اللي قولناه ولازم تطلعوا بره ماتش بلجيكا، وحسام قالهم انسوا وصفّوا وكل واحد يراجع نفسه ومش هيبقى حد موجود مش مركز وبينفذ التعليمات.
إشادة بـ محمد صلاح
وتحدث إبراهيم حسن باستفاضة عن محمد صلاح قائد الفراعنة قائلا: محمد صلاح لاعب كبير وفترة وجوده في أوروبا غيرته، وعارف وعنده ثقة في حسام حسن إنه بيساعده يظهر بأفضل صورة ولمصلحة المنتخب، وهو لاعب محترف فاهم إن مصلحة الفريق أهم.
وأكمل: محمد صلاح ذكي وعارف إن لما حسام بياخد قرار بيبقى لصالح المنظومة كلها، ومينفعش تبقى في حرب والسلاح في دماغك والرصاصة تطلع في وقت غلط، حسام بياخد القرار في التوقيت الصح.. كل واحد عارف إن حسام بيشتغل لمصلحة الفريق مش لحساب حد، وكلنا بنكمل بعض علشان نوصل لأفضل شكل.
تفاصيل إصابة حمدي فتحي وحسام عبد المجيد
وعن إصابة ثنائي المنتخب حمدي فتحي وحسام عبد المجيد في لقاء نيوزيلندا قال إبراهيم حسن: كنا زعلانين جدًا والفرحة مكملتش بسبب إصابة حسام عبدالمجيد وحمدي فتحي، حمدي عنده شد والدكتور طمنا ومش هيبقى موجود الماتش الجاي وقدامه أسبوع علشان يرجع، حسام عبدالمجيد كان عنده ارتجاج ومفيش كسر ولا شرخ، وكان مُصر يلعب بس الدكتور رفض، وحالته كويسة جدًا.
إبراهيم حسن يتغنى بـ تريزيجيه
وأشاد إبراهيم حسن بمحمود تريزيجيه لاعب منتخب مصر قائلا: تريزيجيه لاعب هايل وملتزم ومفيش منه أي رد فعل وحش، ومن اللعيبة المحترمة ونيته كويسة، وأول ما نزل جاب هدف وده مش سهل.. تريزيجيه له معزة كبيرة عند حسام، وهداف أفريقيا والمنتخب، ودايمًا ملتزم وبينزل في أي وقت، ودي توليفة عملها حسام وحسس كل اللعيبة إن أي حد ممكن يلعب.
وعن تحضيرات جهاز منتخب مصر للمباراة المقبلة قال إبراهيم حسن: الفترة الجاية هيبقى في تغييرات أكتر، لأن حسام عمل فرقتين جاهزين، وده مهم جدًا في بطولة زي كأس العالم.
واستكمل مدير منتخب مصر حديثه قائلا: أول أو تاني أو تالت مفيش فرق، إحنا رايحين كأس عالم مفيهاش هزار، ومفيش فريق ضعيف.. واللي يقولك المجموعة سهلة ده كلام غلط، مفيش منتخب بييجي كأس العالم وهو ضعيف، وأهم حاجة إننا نتأهل، وطموحنا أكبر بكتير من اللي الناس متخيلاه، ومفيش سقف لطموحاتنا.
تاريخ يصنعه حسام حسن
وأشاد إبراهيم حسن بتوأمه حسام حسن المدير الفني لمنتخب مصر قائلا: حسام حسن بيكمل تاريخ كابتن محمود الجوهري وكابتن حسن شحاتة، وبيثبت إن المدرب المصري يقدر ينجح ويعمل إنجازات كبيرة، ولازم ندعم بعضنا طول ما إحنا ضده عمرنا ما هنوصل.. لازم نسعى وندعمه علشان ننجح، ويكفي اللي عمله منتخب مصر مع حسام حسن، عمر أي مدرب أجنبي ما هيحس باللعيبة زي المدرب المصري.
وأشاد مدير منتخب مصر بجماهير الفراعنة التي تؤازر المنتخب في المونديال قائلا: الجمهور المصري في أمريكا وكندا عامل منظر رهيب، ومحتل المدرجات وده بيدينا دافع كبير جدًا.
واختتم إبراهيم حسن تصريحاته مشيرًا إلى وجود أخطاء تحكيمية في لقاء مصر ونيوزيلندا قائلا: كان في أخطاء تحكيمية والهدف اللي دخل فينا كان فيه فاول قبلها، وكان لازم طرد في لعبة حسام عبد المجيد.
