أول تعليق من ميدو بعد إصابته بجلطة في المخ وتأييد حبس نجله
علق أحمد حسام ميدو نجم الزمالك السابق، على إصابته بجلطة في المخ عقب تأييد حبس نجله لمدة 7 أشهر بتهمة حيازة المخدرات.
أول تعليق من ميدو بعد إصابته بجلطة في المخ
وقال ميدو عبر برنامج هنا المونديال المذاع عبر قناة النهار: بشكر كل الناس اللي سألت عليا، ومن أول أزمة حسين ابني وأنا متماسك ومؤمن إن ده ابتلاء من ربنا، وإن ربنا دايمًا عنده الخير.
وتابع: كنت بحاول أوصل رسالة لأولادي إن الإنسان مهما كانت الظروف صعبة لازم يفضل واقف على رجله ويكمل شغله، وإمبارح كان عندي أمل كبير إن العقوبة تتخفف في جلسة الاستئناف، لكن الحمد لله قدر الله وما شاء فعل، وراضيين بحكم ربنا، وإن شاء الله حسين يطلع من الموقف ده أقوى
وأوضح: بعد الحكم رجعت البيت وشعرت بتعب شديد، نبضات قلبي زادت وصدري وجعني ومكنتش عارف أتنفس، ورحت المستشفى، والضغط كان 190 على 100 فاتحجزت.
وواصل: الصبح عرفت إن حسين اتأثر جدًا لما عرف إني تعبان، فخرجت من المستشفى على مسؤوليتي ورجعت البيت لكني تعبت تاني، والدكتور طلب أشعة على المخ وللأسف ظهر إن فيه جلطة خفيفة.
واختتم ميدو تصريحاته: حاليًا أنا في رعاية طبية كاملة في البيت، والدكاترة والممرضة موجودين معايا وباخد الأدوية اللازمة لإذابة الجلطة الحمد لله أنا كويس، وبطمن كل الناس، وإن شاء الله بدعائكم الأزمة تعدي على خير.
