حلمي عبد الباقي ردًا على أعضاء مجلس الموسيقيين: كل رسائلكم تهديد.. وهدافع عن قضيتي لآخر نفس
علّق الفنان حلمي عبد الباقي، وكيل نقابة المهن الموسيقية سابقًا، على تصريحات أعضاء مجلس النقابة، واعتزامهم مقاضاته بتهمة التشهير وتحريض الجمعية العمومية، موضحًا أن جميع تصريحات الأعضاء تعتبر رسائل تهديد مطالبًا من يملك ضده أي مستندات تثبت إدانته يتوجه بها إلى النيابة.
حلمي عبد الباقي ردًا على أعضاء مجلس الموسيقيين: كل رسائلكم تهديد
وقال حلمي عبد الباقي، في فيديو عبر حسابه بـ فيس بوك: كل رسائلكم تهديد، وبقول تاني أي حد عنده مستند لحلمي عبد الباقي وديه النيابة، ساكتين ليه عليا؟، أنا لا بخاف ولا بتهدد، أنا اتشطبت من النقابة ولكن متشطبتش من على ظهر الدنيا، وأنا بدافع عن قضيتي لآخر نفس في عمري، وقضيتي حلمي عبد الباقي مش رجوعي للنقابة أو لأ.
وأردف عبد الباقي: الحمد لله أنا لا بخاف ولا بتهدد ولا على رأسي بطحة، الفيديو موجود ومشيلتوش أنا متكلمتش على المجلس ولا اتهمت حد من المجلس والكلام ده موجود ومش بقوله عشان خايف، ولكن دي الحجة عشان تطلعوا تهاجموني وتشوهوني، وقلت إن بعد الفيديو ده هتشوه وهيحصل عليا حفلة وقد حدث، وفي الآخر تحس أن ده أمر وحاجة محبوكة، كان ممكن حد يطلع وبعدين حد يطلع يوم تاني، لكن كله مرة واحدة وكله نفس الكلام، وكله بيقول مستندات طب ما أنتم لو عندكم مستندات مقدمتوهاش في مجلس التأديب والتحقيق ليه؟ ما أنتم بقالكم 6 شهور بتحققوا معايا مجبتوش مستند يديني ليه؟ علشان لما يحصلي إعدام يبقى شرعي.
وأضاف: والله لو عليا ربع مستند مكنتوش سكتوا عليا وكنتوا علقتوني في السقف، بس الحمد لله تهمتي تهمة شرف، تهمتي أني ساهمت في علاج ناس بين الحياة والموت وغير قادرين، والزمن لما بيقلب على حد ربنا يسترها علينا جميعا، وقلت أن بعد موضوع ناصر صقر قلتلك أنت عالجت واحد منتسب بـ 172 ألف وده مش قانوني، ولكننا قلنا الرحمة فوق القانون.
كما رد حلمي عبد الباقي، على تصريحات منصور هندي، عضو مجلس نقابة الموسيقيين ووكيل لجنة العمل بالنقابة، قائلًا: أستاذ منصور هندي أنت لا تجرؤ تقول الكلام ده في وشي، مناديب إيه يا أستاذ منصور اللي أنا هاخد منها ده أنا حلمي عبد الباقي، وأنت عارفني من زمان أنا بشتغل وبكسب إزاي، والحمد لله أنا دلوقتي مستور أوي، ومش محتاج يتكرمشلي 100 ولا 200 من المناديب، عيب تقول كده، وطالع تقول عيب عليك لما تقول علينا حرامية، أنا مقولتش ومتهمتش حد يا جماعة، وأنا كنت بتحايل عليكم علشان تمضوا للناس الغير قادرين ودي تهمة شرف تضاف ليا مش عليا، ده شرف ليا.
واستكمل: بتقول أنك جبتلي 3 أوردرات هما يعني بـ 400 ألف، ده كلها شوية ملاليم بس أنا اللي بحب أطلع أغني، بتقول أنك بتدفع 75% والنقابة 25%، إيه الكلام اللي يضحك ده؟، أنت بتبقشش على النقابة؟ قولنا الغنى الفاحش ده إزاي علشان نبقى زيك، أنا حلمي عبد الباقي ذو التاريخ المشرف، اللي معروف في الوسط بالرجل المحترم، وأنتم أكيد سمعتوها كتير أوي، أنا مش عايز أطول وبقولك في الآخر أنت أقسم بالله ما تقدر تقول ده في وشي.
