سحر رامي: مريم أحمدي هتعمل قصة حياتي مسلسل.. والسوشيال ميديا مش لطيفة وقالوا بتعملي حاجات مش سنك والبسي الطرحة
تحدثت الفنانة سحر رامي، عن تقديم قصة حياتها في عمل فني، موضحة أن المخرجة مريم أحمدي صاحبة الفكرة، بجاني الكشف عن أحلامها رفقة زوجها الراحل حسين الإمام، التي لم يمهلهما القدر وقتًا لتحقيقها، بالإضافة إلى الحديث عن تعليقات مواقع التواصل الاجتماعي.
وقال سحر رامي، في لقائها مع إذاعة نجوم FM: مريت بحاجات كتير جدًا في حياتي وهي قصة جامدة، وبجد لما حكيت حاجات عن قصة حياتي مع المخرجة مريم أحمدي قالتلي هقعد معاكي وهنعمل مسلسل، وقولتلها هتدفعي فلوس كتير لأني مش همثل الدور، وفعلًا قصة حياتي مليانة وتصلح تعمل 30 حلقة كويسين لأني عايشة بقالي كتير وحضرت حقبات كتير من الزمن والتغيراتن فإلحقوا اللي عايز يكتب مسلسل كويس.
وعن المشاريع التي لم تكتمل للراحل حسين الإمام، فعلقت سحر رامي: مشاريعنا وكل أحلامنا وتخطيطنا كان متوفق بس على سنتين ابننا يخلص المدرسة وكنا هنروح في مكان تاني خالص، كنا هنمشي خالص من البلد وهنعمل بقى مشاريع تانية خالص وهنعيش بطريقة تانية خالص، لأن الحياة هنا كانت قاسية علينا جدًا، كنا عايزين نعيش مرتاحين ونفتح مكان أخيط فيه وأعمل أزياء ونطبخ فيه ونعيش مرتاحين، ولكن القدر ودي أحلامنا اللي متحققتش.
وتطرقت سحر رامي، للحديث عن تعليقات مواقع التواصل الاجتماعي، قائلة: جالي تعليقات وحشة كتير وأنا مكنتش بقرأ، في ناس مش لطيفة خالص ولكني ببص على الجانب الكويس، واللي بيقول الجانب الوحش ممكن يأثر فيا فمبقتش أشوف، في ناس موراهاش غير أنها تشتم وتقول إيه لبسك وشعرك ده مش سنك وإلبسي طرحة، أنتوا مالكم؟ هتبقوا مبسوطين لو عملت كده؟، أنا مبسوطة كده واللي مش عاجبه هو حر.
