أسوأ أيام حياتي.. عزيز الشافعي عن أزمة أغنية بحرية: الناس حسبنت عليا وشيرين بقت تقولي هما بيهاجموك ليه؟
تحدث الملحن عزيز الشافعي، عن أزمة انتقادت أغنية بحرية لـ الفنانة شيرين عبد الوهاب، ومحمد حماقي، موضحًا أنه عاش أسوأ يومين في حياته على الإطلاق بسبب تأثره بالهجوم الذي واجهه لأول مرة في حياته.
وقال عزيز الشافعي، في لقائه مع الإعلامية إسعاد يونس، في برنامجها صاحبة السعادة: أنا بشوف إن كل الأغاني اللي اتهاجمت نجحت وده اللي حصل في أغنية بحرية، والناس بدأوا يشتموني من قبل ما الأغنية تنزل، ولما نزلت وكانت منتشرة وماحدش بيهاجم حماقي أو شيرين، وكانت غريبة أوي أن لو أغنية معجبتش حد يهاجم الملحن، وإحنا لما بنشوف أن حد بيقول الأغنية وحشة إحنا كمان بنحس أن الأغنية وحشة، وقضيت أول يومين في أغنية بحرية أسوأ أيام حياتي.
وأضاف عزيز الشافعي: شيرين وحماقي من أول لحظة شافوا اللي حصل، وأول مرة في حياتي اتهاجم ومكنتش عارف أستخبى فين وقفلت تليفوني مش عايز أتكلم مع حد، والناس عملت فيديوهات وقالت حسبي الله ونعم الوكيل في عزيز الشافعي، كأني عملت مصيبة والأغنية مفيش فيها إسفاف.
وتابع: حماقي وشيرين كلموني يتطمنوا عليا وشيرين تحسي أنها أمي مش صاحبتي ولا نجمة بتغني معايا، وكانت بتتكلم بمشاعر هما ليه بيعملوا كده وبيتكلموا عليك أنت؟
