بعد وداع كأس العالم.. أحمد شوبير يساند نجله مصطفى برسالة مؤثرة
كتب أحمد شوبير رسالة مؤثرة لـ نجله مصطفى، وذلك بعد الوداع المؤلم لمنتخب مصر أمام الأرجنتين في بطولة كأس العالم 2026 بالخسارة القاتلة 3-2 في ثمن النهائي.
بعد وداع كأس العالم.. أحمد شوبير يساند نجله مصطفى برسالة مؤثرة
وقال شوبير عبر حسابه الرسمي على فيسبوك: أكيد سعيد وفرحان بكل ردود الأفعال والاحترام الكبير لمنتخبنا الوطني، وأكيد حزين جدًا لخروجنا بفعل فاعل فاسد من المونديال، ولكن دلوقتي هكتب مشاعر أب شاف ابنه وهو بيعافر وبيحارب وبيموت نفسه من سنين، وبيواجه عقبات واتهامات على مدى سنوات.
وأضاف: لو كنت أنا مكانه، كنت رميت الفوطة من زمان وقلت بلاها كورة من الأصل، ولكنه كل يوم كنت بشوفه وهو بيصمم على تحقيق حلمه إنه يلعب كأس عالم، وكل فترة يقولي: هشرفك وأرفع راسك، ويقولي صدقني أنا مش بقول كلام وخلاص، وبكره تشوف”، وطبعًا كنت بشجعه، لكن للأمانة مكنتش مصدقه.
وتابع شوبير: لكن هو كان مصدق نفسه، وكان وما زال وراه أم بمعنى الكلمة، صدقت حلمه لحد ما بقى حلمها هي، وحاربنا كلنا عشان نحقق حلمه، لكنه كان أكترنا ثقة وتركيزًا وإصرارًا والتزامًا واحترامًا، عايش حياة صعبة، احتراف بمعنى الكلمة، الأكل، والنوم، والتدريب الفردي بعيدًا عن الفريق، بمواعيد منضبطة، مبيسيبش حاجة للصدفة أبدًا، شغال بمبدأ ارضِ ربك، واعمل اللي عليك، واحترم مهنتك، وسيب الباقي على الله، عامل اللي عليه بما يرضي الله، ومستني المكافأة من المولى عز وجل، لا بيسأل على عقد ولا فلوس، فقط واحد عنده حلم، ومصدقه، وواثق إن ربنا هيحققه، وكل يوم يقولي هتعمل إيه وإنت شايفني بلعب كأس عالم وربنا بيكرمني أنا والفريق كله؟، للأمانة مكنتش بعرف أقوله إيه، وكنت بخاف عليه إن الحلم ميتحققش.
وواصل أحمد شوبير في رسالته المؤثرة: لحد ما جه كأس العالم، والحلم بقى حقيقة، وكمان لقيته بيتألق، وربنا بيكرمه ويوفقه، وكل ما أكلمه وأقوله هايل يا بطل، يقولي لسه معملناش حاجة، بس إنتوا ادعولي، أقوله هطلع أتكلم عليك النهارده في البرنامج، يقولي لا، اتكلم عن الفريق وإدي للناس حقها، أنا لا، أقوله يا ابني لازم تاخد حقك، يقولي اسمع كلامي، وطبعًا بسمع كلامه، لأني محبش أزعله ولا أزعل حد من ولادي أبدًا، لأنكم متعرفوش قد إيه ولادي هما نقطة ضعفي.
وأردف: المهم، كبر الحلم وصدقناه، وكلمته قبل ماتش الأرجنتين وسألته فيه أمل؟، رد قاللي: طبعًا، وهنكسب إن شاء الله، وطبعًا اتمنيت له التوفيق، وطبعًا أمه كانت قاعدة جنبي، مبتبطلش دعاء ولا صلاة، على أمل إنه يحقق حلمه هو ومنتخبنا، لحد ما جات المباراة، وحسيت إن الأمل بيقرب، ويقرب، ويقرب، ولكن فجأة اتسرق الحلم بفعل فاعل فاسد، وخرجنا من كأس العالم بمؤامرة شهد بيها كل العالم، خرجنا، نعم، من كأس العالم، ولكن دخلنا التاريخ من أوسع أبوابه، وأجبرنا الجميع على احترامنا، وهفضل مستني لحد ما يحقق حلمه وأمله، حتى لو كنت مش من أهل الدنيا، لكن أكيد هكون حاسس بيه وفرحان ليه.
وأتم شوبير: اوع تزعل يا أوفا يا حبيبي، إنت وكل نجومنا كفيتوا ووفيتوا، ومعلش بقى يا ابني، هتتعب 4 سنين تاني، بس في الآخر والله هتحقق كل اللي نفسك فيه، لأني عارف إصرارك كويس، ومتأكد إنك هتوصل لهدفك، يا مصطفى... يا مصطفى... أنا بحبك يا مصطفى، عشان خاطري، أوعى تزعل أبدًا.
