حذف أغنية رضا البحراوي "عايش ما بين تعابين" بعد يومين من طرحها على يوتيوب
فوجئ جمهور المطرب الشعبي رضا البحراوي بحذف أحدث أغانيه عايش ما بين تعابين من قناته الرسمية على موقع يوتيوب، وذلك بعد مرور يومين فقط على طرحها، في خطوة أثارت تساؤلات واسعة بين متابعيه حول أسباب اختفاء الأغنية بشكل مفاجئ.
وقال المنتج طارق عبد الستار، في منشور عبر حسابه الشخصي بموقع فيس بوك: ولا هيفرق معانا قفل الأغاني، بناقص اليوتيوب خالص، بس لو تقدروا تنزعوا حبه من قلوب محبيه وجمهوره ورونا. اللي بيحبه ربه بيحبب فيه خلقه. رضا البحراوي مش هيبطل ومستمر.
وأضاف: يا عم المجال يا بابا، الشغلانة يا اللي الأرض أرضك، بس ورحمة أمي ما هحلك، وهاقفل كل أغانيك، والعين بالعين والسن بالسن، ومش هالعب مع هلافيت مأجورين عشان أنا عارف إن أنت رأس الحية، اللعب معاك أنت.. فاكر الـ60 ألف اللي دفعتهم للي شغال معاه عشان تسمع كل ده؟ هيطلع للنائب العام.. اللي جاي خير بإذن الله، وعلى فكرة أنا ما بسيبش حقي مهما طال الوقت، استنى الجديد عشان تقفلها برده.
وفي منشور آخر قال: غيره وصفار وسواد، الأغنية الجديدة كمان اتقفلت.. إن شاء الله خير، بس محدش يرجع يعيط في الآخر.
أعمال رضا البحراوي
وفي وقت سابق، نشر الفنان الشعبي رضا البحراوي رسالة مؤثرة عبر حسابه الرسمي على موقع التواصل الاجتماعي فيس بوك، عبّر فيها عن رؤيته لظاهرة الغيرة والحقد التي يتعرض لها أي شخص ناجح، مؤكدًا أن هذه التصرفات ما هي إلا دليل على النجاح والتقدم.
وجاء في منشور البحراوي: ما تكرهش اللي بيغير منك، بالعكس احترم غيرته، لأنه من غير ما يقصد بيقولك: أنا مش قادر أبقى زيك.
وأضاف أن الاستهداف بالكلام والتشكيك أمر طبيعي يحدث لأي شخص يحقق نجاحًا حقيقيًا، ويواصل تطوير نفسه، معقبًا: طول ما أنت ناجح، وواقف على رجلك، وبتتعب على نفسك، طبيعي جدًا يطلع ناس تحاول تقلل منك، أو تحاربك بالكلام، أو تشكك فيك وفي نيتك.
وأكد البحراوي أن مثل هذه المحاولات لا تدل على ضعف الشخص المُستهدف، وإنما على ضعف من يحاول الإساءة أو التقليل منه، قائلًا: ده مش ضعف منك، ده ضعف منهم هما. مش قادرين يوصلوا لمكانك، فأسهل عليهم إنهم يحاولوا يوقعوك.
