الأهداف العكسية وصدمة الأرجنتين.. محمد هاني يكشف كواليس المشاركة في كأس العالم
تحدث محمد هاني ظهير أيمن منتخب مصر عن كواليس مشاركة الفراعنة في كأس العالم 2026، كاشفًا موقفه بعد تسجيله هدفين عكسيين خلال مواجهتي بلجيكا وأستراليا في المونديال.
أبرز تصريحات محمد هاني بعد المشاركة في كأس العالم
قال محمد هاني في تصريحات عبر برنامج الحكاية المذاع على قناة mbc مصر: قبل المشاركة في كأس العالم كان حديث اللاعبين فيما بينهم إننا قادرين على تحقيق شيء في البطولة وليس المشاركة في المباريات الثلاث فقط، ومن أول يوم اتفقنا إننا مش جايين للتمثيل المشرف وعلى الأقل نصعد من دور المجموعات.
وواصل: قبل المباريات كنا بنشوف اللاعبين في المنتخبات المنافسة ينظروا لمحمد صلاح، وقبل المباراة ما تبدأ كانوا بيطلبوا منه يبدلوا التيشيرتات، وفي مباراة الأرجنتين ميسي جه من آخر الدنيا علشان يسلم عليه، فإحنا كان معانا قائد في الملعب بيشدنا مهما كانت الظروف صعبة.
وتحدث ظهير أيمن الفراعنة عن تسجيله هدفين في مرمى المنتخب، حيث قال: إحساس وحش جدا إنك تسجل جول في مرمى في بلدك والأمر محصلش في تاريخي كله غير مباراتي بلجيكا وأستراليا، وفكرة إنك بتمثل بلدك في كأس عالم وتجيب جول في نفسك بالنسبالي حاجة كبيرة والموضوع كان صعب أوي، لكن أنا بتحمل المسؤولية، وكنت هزعل من نفسي لو مدخلتش المنطقة وحاولت، إني أسجل جول في نفسي بالغلط أحسن من إني أهرب أو مدخلش في اللعبة، ووقتها كل تفكيري بيبقى إزاي هقدر أكمل باقي دقايق الماتش وإني مينفعش أحط وشي في الأرض لإن وقتها المباراة هتروح مني أكتر.
وأكمل: لما وصلنا ضربات ترجيح في مباراة أستراليا قصاد قولت للاعبين جنب “ محدش يضيع يا جماعة.. مينفعش حد يضيع” لأن كنت هشيل الليلة لوحدي، لكن ربنا ستر وعدت على خير وربنا مضيعش تعبي.
وواصل: حسام حسن معرفش إني سجلت الهدف في مباراة أستراليا غير بعد ما اللقاء خلص، لأن كان فيه لاعب طويل ورايا من أستراليا وكان فاكر إن هو اللي سجل الهدف.
وعن الانتقادات التي تعرض لها، رد: هذا الأمر بيتكرر معايا بشكل كبير، لكني بتقبل المزاح والجماهير كانت بتسهر تتفرج على المباريات رغم إن عندهم شغل، مكنش ينفع اتضايق مهما قالوا حاجات سلبية أو حاجة أنا مش حاببها، لأن دوري أشتغل بس عندي أهلي وأصحابي وناس مؤمنة بيا.
محمد هاني يكشف كواليس مباراة الأرجنتين
وقال ظهير أيمن منتخب مصر: الأيام الأربعة قبل مباراة الأرجنتين كلهم كانوا محاضرات عن الفريق واللاعبين (كنا بنشوف بيتنفسوا إزاي)، وكل سلبياتهم وإيجابيتهم ذاكرنا كل حاجة، اشتغلنا على كده ونجحنا أغلب الماتش وكل حاجة مشيت تمام، ممكن هما ضغطوا جامد في الآخر وإحنا تعبنا بدنيا، أنا مثلا لعبت 5 مباريات كاملة ومنهم ماتش فيه وقت ضايع، إحنا كنا خلاص وصلنا لحتة صعبة.
وتابع: لما سجلنا الهدف الثاني بصيت على النتيجة كانت 2-0 والدقيقة 80، أنا عايز أحافظ على اللي عملته وكلها 10 دقايق مستحيل يدخل فيا جولين، لما حصل كده وبعد الماتش لقيتنا خسرنا أنا وقفت شوية في الملعب مش مستوعب وبقول إحنا هنلعب إكسترا تايم إحنا مخسرناش، الماتش مخلصش، ولما دخلنا قعدنا في حالة صمت مش مصدقين وكله زعلان ومضايق بس المسؤولين لما دخلوا واتكلموا واحدة واحدة الموضوع بدأ يفك.
وزاد: بعد الخسارة كانت من المرات القليلة اللي أشوف فيها حسام حسن بالشكل ده، هو مش بيحب الخسارة، والمهندس هاني أبو ريدة حاول يهديه لكنه فضل يقول أنا مخسرش أنا مخسرش.
واختتم محمد هاني تصريحاته: محمد هاني: سألنا حكم في كأس العالم عن إلغاء جول زيكو كان مستغرب، وقال إن لجنة الحكام نبهت عليهم لو حصل فاول عند مرمى فريق والمنافس كمل وعدى نص الملعب وسجل والالتحام كان بسيط إن الحاجات دي تعدي.
