سعفان الصغير مدرب حراس مرمى المنتخب يكشف سر اختيار شوبير حارسًا أساسيًا للفراعنة في مونديال 2026
كشف سعفان الصغير مدرب حراس مرمى منتخب مصر، سر اختيار مصطفى شوبير حارسًا أساسيًا للمنتخب في كأس العالم 2026 المقامة في الولايات المتحدة وكندا والمكسيك.
تصريحات سعفان الصغير مدرب حراس مرمى منتخب مصر
وقال سعفان الصغير خلال تصريحات تليفزيونية: أنا شاركت في اختياره مع الكابتن طارق سليمان والكابتن محمد عبد الواحد، وقبلنا إبراهيم حسن، لكن ترشيحنا كان مجرد رأي، بينما القرار النهائي كان للكابتن حسام حسن، فهو صاحب القرار.
وواصل: مصطفى شوبير من نوعية الناس اللي عاوزة تطلع أفضل ما عندها، والإنسان لما بيحب شغله، حتى لو كان رقم 2 أو 3، بيكون نفسه يوصل لرقم 1، ودي حاجة كويسة، شوبير عنده طموح كبير، وعاوز يبقى رقم 1، ونفسه يحترف خارج مصر.
وأفاد: الاحتراف في الخارج فائدة كبيرة لمصر، وبيفرق معانا في المباريات الدولية، ومصطفى من نوعية اللاعبين اللي عندهم حماس وعزيمة.
وواصل: أنا اشتغلت 25 سنة كمدرب لحراس المرمى، وكنت بشارك في تدريب حراس كتير في الأندية، وأحيانًا كنت بزهق من التمرين وعاوز يخلص لما بلاقيهم مش عاوزين يطوروا من نفسهم، لكن مصطفى شوبير شخص مختلف.
وعن الفارق بين أحمد شوبير ونجله مصطفى شوبير، قال: مصطفى أعلى من الكابتن أحمد شوبير بمراحل في حراسة المرمى. أنا لعبت مع الكابتن أحمد شوبير زمان، وعسكرت معاه وكنا في أوضة واحدة، لكن مصطفى يعديه بمراحل، وأنا شايف ده من زمان، قبل ما أتولى مسؤولية المنتخب.
وعن أسباب اختيار مصطفى شوبير على حساب محمد الشناوي، قال سعفان: فيه أسباب فنية، الشناوي كان في الفترة الأخيرة تعرض للإيقاف مع النادي الأهلي، فكان بعيد شوية عن المباريات، أما مصطفى فلعب آخر مباريات الأهلي، وكانت رجليه جوه الملعب، وقدم مباريات إسبانيا والسعودية، وكان في أفضل حالاته الفنية، الشناوي كان موجود معانا، لكن بعد ما أبدينا رأينا، اتخذ الكابتن حسام حسن القرار.
وعن كيفية إبلاغ محمد الشناوي بالقرار، كشف سعفان الصغير قائلًا: الكابتن إبراهيم حسن هو اللي عمل ده، وقعد معاه، لأن الشناوي راجل عظيم، وأعطى الكثير للنادي الأهلي ولمنتخب مصر.
