إمام عاشور: مدرب الإسماعيلي رفضني.. وأمي أنقذتني من أتوبيس كان بيولّع
كشف إمام عاشور، نجم منتخب مصر والنادي الأهلي، كواليس بدايته في كرة القدم، مؤكدًا أن انضمامه إلى غزل المحلة جاء بالصدفة بعدما شارك في تقسيمة خلال مرافقة شقيقه إلى النادي.
تصريحات إمام عاشور
وقال إمام عاشور خلال تصريحات تليفزيونية: "قبل ما أروح غزل المحلة، كنت بلعب في أكاديمية، وكان أخويا عنده تمرين في الغزل وروحت معاه، كانوا ناقصين ونزلت معاهم تقسيمة، وبعدها قالوا لمحمد أخويا لازم يمضي معانا، وتاني يوم بعتولي حد البيت عشان أمضي."
وأضاف: "قبلها كنت روحت الإسماعيلي بس محصلش نصيب، والمدرب وقتها قالي ملكش مكان في النادي."
وتحدث لاعب الأهلي عن موقف مؤثر جمعه بوالدته: "كنت في أتوبيس بيولّع، أمي كسرت الإزاز وطلعتني، وقلتلها هيجي يوم وأعوضك عن كل حاجة، وجمعت تمن سلسلة وروحت جبتها لها."
وتابع: "فيه أوقات كتير مكنش بيبقى معايا فلوس إني أسافر، والدي ووالدتي كانوا بيستلفوا عشاني، وبشكرهم على كل اللي عملوه ليا."
وتابع: "مقدرش أنسى كل اللي عملوه عشاني مهما كنت صغير وقتها، كل التضحيات كنت بشوفها في عينيهم، ومكنش بيبقى فيه فلوس خالص لكن كانت بتتصرف عشاني."
وعن أول راتب له، قال إمام عاشور: "أول هدية جبتها لماما كانت من أول قبض ليا في المحلة، 250 جنيها، روحت إديتها 100، ووالدي 100، وليا 50، وفضلت أعمل كده كل شهر لحد ما جمعت تمن السلسلة وجبتها لأمي."
وأكد نجم منتخب مصر التزامه الكامل تجاه الأهلي: "لو فيه أي عروض مش هقدر أتكلم في أي حاجة غير من خلال النادي الأهلي، وإمام عاشور تحت أمر الأهلي في أي وقت."
وأشار إلى أن الإشادات العالمية التي تلقاها خلال كأس العالم كانت دافعًا له، موضحا: "إشادات الصحف العالمية كانت بتوصلني دايمًا، وكانت بتديني دافع كبير في باقي الماتشات."
كما دخل إمام عاشور في فقرة سريعة عن زملائه داخل المنتخب، حيث اختار ياسر إبراهيم إذا ذهب إلى خناقة، ومحمد صلاح لقعدة دبلوماسية أو للتوسط لدى حسام حسن، بينما اختار عمر مرموش لتصوير فيديوهات تيك توك أو التسوق، ومحمد عبد المنعم إذا احترف خارج مصر، وكهربا أو محمد هاني إذا اتجه إلى التمثيل.
وأضاف مازحًا عن شريك مشروعه المستقبلي: "محمد صلاح.. مفيش غيره في المنتخب، كلهم ميتين."
