مروان عطية يوضح تصريحاته بشأن تضحيات لاعب الكرة: مش بتكلم على الحياة بشكل عام
وجه مروان عطية لاعب الأهلي ومنتخب مصر رسالة إلى الجماهير، بعد جدل تصريحاته الأخيرة حول تضحيات لاعب الكرة بسبب المشاركة في البطولات.
مروان عطية يوضح تصريحاته بشأن تضحيات لاعب الكرة
وكتب مروان عطية عبر حسابه على إنستجرام: أنا بعتذر يا جماعة لو حد فهم كلامي غلط بخصوص تضحيات لاعب الكرة، أنا كنت أقصد ضغط وتعب مجال الكرة اللي هو شغلي مش أكتر.. إنما مش بتكلم على ضغط أو تعب الحياة بشكل عام.
وتابع: أنا عارف كويس إن أهلنا وأخواتنا اللي إحنا منهم بتتعب وبتشقى وبتجري كل يوم على رزقها، وعندها تضحيات عظيمة وضغوط أكبر بكتير.. إحنا الحمد لله ربنا رزقنا بشغلانة.
واختتم مروان عطية رسالته: يعلم ربنا إني كنت بتكلم بخصوص جزئية ضغوط الكرة، التي لا تقارن بضغوط الحياة وتعب الناس، ولكل شغلانة في الحياة فيها الحلو والوحش، أنا آسف وأتمنى أكون وضحت لإني مش بحب حد يزعل مني.
وتعرض مروان عطية لانتقادات بعد تصريحاته مع الإعلامي إبراهيم فايق، حيث قال: في تضحيات كتير بنضحي بيها، إحنا محرومين من حاجات كتير والله العظيم، بنتي أول امبارح قعدت في حضني عشر دقايق مش عايزة تسيبني.
وكان محمود عبد الرازق شيكابالا قائد الزمالك السابق، رد على تصريحات مروان عطية قائلًا: محدش يقول لاعب الكرة مضغوط، الراجل اللي بيطلع من بيته الفجر عشان يأكل عياله هو البطل الحقيقي اللي عليه ديون ومش عارف يسددها، إحنا بنضحك على الناس بالكلام ده.
