أول تعليق من طبيبة بعد إنقاذها حياة راكب: تالت مرة يحصل معايا الموقف ده على الطيارة
كشفت الطبيبة مروة صلاح التي أنقذت حياة راكب تعرض لوعكة صحية مفاجئة على متن رحلة مصر للطيران القادمة من لندن، كاشفة تفاصيل اللحظات التي أنقذت فيها حياته، مؤكدة أنها أدت واجبها الإنساني والمهني وأنها لم تتوقع أن ينتشر هذا الموقف بهذا الشكل عبر مواقع التواصل الاجتماعي.
أول تعليق من طبيبة بعد إنقاذها حياة راكب
وقالت الطبيبة مروة صلاح في تصريحات خاصة لـ القاهرة 24: بعد نص ساعة من إقلاع الطائرة دكتور محمد أغمى عليه وفقد وعيه، وكنت في درجة الأعمال ولما دخلت ممر الطيارة وكشفت عليه كان عنده هبوط في سكر الدم والضغط
وأردفت مروة صلاح: طلبت شنطة الإسعاف اللي في الطيارة وركبت له محلول ملحي اتحسن جدًا وبدأ يستعيد الوعي، الكابتن قالي ممكن نهبط بالطائرة في اليونان، رفضت لأن حالته بدأت تتحسن، وخطوة علاج مريض على طيارة محتاجة جراءة طبعًا وفيها نوع من المخاطرة.
وأضافت الطبيبة: الطائرة مش زي المستشفى طبعًا لو حصل أي حاجة للحالة نقدر نتدخل لكن، أنا ساعدته باقل الإمكانيات، واللي خلاني أتدخل وابدأ اعالجه إن من واقع شغلي بشوف ده بشكل يومي في المستشفى، ولما وصلت بيتي نمت وصحيت لقيت الموضوع انتشر مع إني متوقعتش خالص، وتالت مرة يحصل معايا الموقف على الطيارة وربنا بيسخرني في الوقت المناسب، وحاسة إني عملت اللي عليا كـ دكتورة وده واجبي ناحية أي مريض في أي مكان ووقت.
