مقدرناش على الباعة الجائلين.. أيمن الشيوي يوضح خطة توسيع وتطوير مسارح العتبة
كشف الفنان أيمن الشيوي رئيس قطاع المسرح في وزارة الثقافة، تفاصيل تطوير مسارح العتبة، وكيفية تعاملهم مع الباعة الجائلين المحيطين بالمسارح الذين حجبوا الرؤية والوصول للمسارح على مدار السنوات الماضية.
وقال أيمن الشيوي خلال لقاؤه مع القاهرة 24: مجمع المسارح في العتبة حضرتك هيبقى معزول تمامًا بأسوار، بحيث إن فيه باركينج وفيه حديقة وفيه كافيتريا موجودة مثلًا في مسرح الطليعة وفي مسرح العرائس، والمسرح القومي له باركينج خالص، بحيث إنك إنتِ لما تدخلي المسرح تبقي منعزلة تمامًا عن المحيط اللي هو السوق الخارجي للعتبة، لكن إحنا في الفترة اللي فاتت كنا في بحث دائم للتطوير، وتم التواصل والتنسيق مع جهاز التنسيق الحضاري مع محافظة القاهرة علشان يبقى فيه بديل آخر ومدخل آخر لمسارح البيت الفني للمسرح التلاتة اللي هما في محيط واحد “المسرح القومي، مسرح الطليعة، ومسرح العرائس”.
وأشار إلى أن هناك تواصل وتنسيق بين الجهات المختصة ووزارة الثقافة، وأضاف: إحنا كنا فاهمين المسألة سهلة، لكن اكتشفنا إن المسألة متشابكة جدًا، إحنا عملنا اجتماعين وتم اتخاذ إجراءات حقيقية؛ الاجتماع الأول تم معرفة الحالة ودراسة الحالة، الاجتماع التاني كان بوجود مرافق زي مترو الأنفاق، الصرف الصحي، المياه، وزارة الاتصالات، مياه الشرب، الكهرباء، كل هذه القطاعات، وتم تحديد مهمة محددة لكل جهاز بحيث إننا ننسق العمل مع بعضنا. وفعلًا بدأ يبقى فيه إجراءات حقيقية، المسألة مش سهلة زي ما الناس متخيلة إننا هنشيل حاجة ونحط حاجة، لا.
وأردف أيمن الشيوي: إحنا عشان نعمل حاجة بشكل حقيقي لازم تتوافر وتتضافر جهود كل هذه الأجهزة وهذه القطاعات عشان يكون فيه مدخل لهذه المسارح من حديقة الأزبكية ومن ميدان الأوبرا، بحيث إن العربية تقدر توصل للمكان ده، ويكون فيه مكان بشكل حضاري تبقي منفصلة تمامًا عن السوق أو منطقة السوق اللي موجودة في العتبة.
كيف تعاملت وزارة الثقافة مع الباعة الجائلين حول مسارح العتبة
أما عن طريقة تعامله مع الباعة الجائلين، قائلًا: إحنا مقدرناش يا فندم على الباعة الجائلين وماحدش يقدر على الباعة الجائلين، إحنا بندور على بدائل وبنحل المشكلة، إحنا بنحل في حدود المتاح بالنسبة لنا، الباعة الجائلين دي مشكلة كبيرة جدًا لها بعد اجتماعي ولها مشاكل تانية كتيرة أوي لازم يتم التعامل معاها مرحليًا وبدراسة جدوى حقيقية، إحنا عندنا آلاف من الناس بتشتغل وموجودين على الأرض في المكان، فماحدش يقدر بين يوم وليلة إنه يقول لهم اتفضلوا امشوا، ماحدش يقدر يعمل كده، وفيه أجهزة كتيرة مختصة لازم جميع الأجهزة تتضافر جهودها مع بعضها لحل المشاكل بتاعتنا.
