حجزوني بمصحة نفسية.. فتاة ببني سويف تزعم تعرضها للعنف الأسري من قبل والدتها وأشقائها: عايزين ياخدوا فلوسي وشقتي
نشرت فتاة تدعى هايدي الشابوري، من بني سويف، منشورًا لها عبر حسابها بموقع التواصل الاجتماعي فيسبوك، تزعم فيه تعرضها للعنف الأسري من قبل والدتها وأشقائها، بسبب رفضهم زواجها من شاب.
وقالت هايدي الشابوري، فتاة تزعم تعرضها للعنف الأسري والاحتجاز بمصحة نفسية من قبل أسرتها، في منشور بحسابها عبر موقع فيسبوك، عاوزة أقول كلمتين مهمين أنا هايدي عندي 27 سنة مخلصة حقوق ومعايا ماجستير وبحضر دكتوراة، بعد وفاة والدي الدنيا انقلبت رأسًا على عقب، حبيت شخص وهما كانوا رافضين، بعدين وافقوا وطلبوا منه كل حاجة، حاجات أكبر من إن أي حد يطلبها، ذهب وفرش وحاجات كتير، جاب كل حاجة عشان يثبتلهم إنه شاريني، وقالهم حددوا ميعاد عشان نحدد القائمة، قالوله لأ مش هنجوزهالك.
فتاة ببني سويف تزعم تعرضها للعنف الأسري من قبل والدتها وأشقائها
وتابعت هايدي الشابوري: حتى بعد ما وافقوا وطلبو كل حاجة، ضحكوا عليا وقالولي إحنا موافقين وهنكتب لك القائمة، فجأة لقيت اثنين داخلين عليا اوضتى، وقعدت أصوت وأجري في الشقة أنادي علي ماما تلحقني، مكنتش أعرف إنها هي اللي جيباهم، فجأة طلع من جيبه مخدر وإدهولي، ماما كتفتني وكتمت نفسي بإيدها عشان محدش من الجيران يسمعني، وأختي وابن عمي ساعدوا في ده، صحيت لقيت نفسي في مصحة في القاهرة، بعد ما خدروني.
وتابعت هايدي الشابوري: أنا هنا وبعمل إيه؟ معرفش مين الناس دي وفين أهلي. ملقتش غير مشرفة المصحة بتقولي: بصي، إحنا هنا اللي بيقعد المريض النفسي أو اللي بيتعاطى، وإحنا هنقعدك مع دكتور نفسي وهنعملك تحليل. طلعتي لا ده ولا ده هنمشيكي. بالفعل عملولي تحليل، ومش بتعاطى، وقعدت مع دكتور نفسي حكت له اللي عملوه. قالولي: دي مشكلة عائلية، إنتِ مش مريضة ولا حاجة، ومش هينفع أكتب لك أدوية عشان ما تتعبيش.
وإستكملت: أخويا كلم مشرفة الدار وأكد عليها آخد أدوية زي المرضى النفسيين بالظبط، قولتلها أنا بتعب مينفعش آخده أنا سليمة، قالتلي أنا مش هديهولك عشان ده بيعمل تلف في خلايا المخ للشخص السليم وهيقلب معاكي بإدمان ومش هنيمك في أوضة المرضى عشان متتعبيش نفسيا أنا هاخدك في أوضتي، بس لو أخوكي كلمك لازم تقوليله إنك بتاخديه بانتظام، فجأة لقيته جالي المصحة اليوم الرابع بعد ما اتأكد من التحليل كان عاوز شهادة إني مريضة عشان يحجر عليا قانونًا، بس ربنا أراد ونصرني والدكتور قال كلمة حق إني مش مريضة.
وأردفت هايدي الشابوري: لقيته جاي لي زيارة ومعاه عقد وبيقولي: إمضي، عاوز يبيعني شقتي اللي في البلد، قولت له: فين فلوسها؟ قالي: مع ماما قولت له: مش همضي غير وفلوسي في إيدي، حتى لو هتحبسني هنا العمر كله.. كلام كتير بقى، حاول يعرف مكان شقتي اللي باسمي في بني سويف، وفلوسي حطاها في البنك ولا في البوسطة، وكام، وعداد الشقة كارت ولا كهرباء، ولو كارت فين مكانه.
وسابوني شهر كامل، جسمي اتقطع حرفيًا واتبهدلت حساسية من اللي حواليا، كنت بنام وألاقي ناس من تحت طالعين لنا بالليل مهلوسين من الأدوية، وكنت بشوف مرضى جايين بيتخانقوا وبيضربوا كل رجالة الدار شوفت حاجات معرفش إنها موجودة في دنيتي دي أصلًا، ولقيت أختي بتكلمني قبل ما الشهر بتاع المصحة يخلص: هنبعت لك موظف من الشهر العقاري عشان تتنازلي عن شقة بني سويف وننقل القاهرة، لا يا جماعة، أنا ليا حياة وليا شغلي مش عاوزني أتجوز الشخص ده خلاص مش هتجوزه، بس سيبوني أعيش حياتي ودنيتي وشغلي وأرجع له.
واختتمت: خرجوني وحبسوني في البيت يومين، من غير موبايل ولا خروج ولا أي حاجة. وأي حد كان بيسأل عليَّ، بيقولوا له: عاملة حادثة، عشان محدش يدور عليَّ. قالولي: هتعملي توكيل ونبيع الشقة. قولت لهم: ماشي، لحد ما خرجت من البيت، حتى شقتي اللي في شرق كسروا الكالون وأجروها بعقد باسم والدتي. وخدوا مني بطاقتي وأوراق ملكيتي للشقة والفيز الخاصة بي، وعملت لهم محضر حجز وإكراه على أخذ المخدر الخاص بالمرضى وتعنيفهم لي.
أنا حاليًا مش في البيت، ونزلت البلد. بيحاولوا يوصلوا لي عشان يحبسوني تاني، وهمشي قانوني في كل حاجة. لو اختفيت، اعرفوا إن أهلي عملوا فيَّ حاجة. أنا ماليش حد يحميني بعد ربنا. أنا سايبة البيت بإرادتي وعاملة محضر، وأنا مش هرجع بسبب تعنيفهم لي.
