هاني رمزي: عادل إمام دائم السؤال علينا.. ومحمد صبحي مسرحي من الدرجة الأولى
كشف الفنان هاني رمزي عن علاقته بعدد من نجوم الفن، وتحدث عن بداياته الفنية والصعوبات التي واجهها قبل دخول مجال التمثيل، مؤكدًا أن إثبات النفس في هذا المجال لم يكن أمرًا سهلًا.
وقال هاني رمزي خلال استضافته في بودكاست مع الإعلامي خالد منتصر على القاهرة 24: أنا تمردت على محمد صبحي كتير، وكانوا بيسألوه أنت صابر عليه ليه؟ وكان بيرد لأنه بيفكرني بشبابي، مشيرًا إلى أن صبحي يعد من أهم رموز المسرح.
وأضاف: عادل إمام كويس، وأنا دائم السؤال عليه، لأنه دائم السؤال علينا، ومحمد صبحي راجل مسرحي من الدرجة الأولى.
وتحدث رمزي عن بداية اختياره طريق الفن، قائلًا: قولت لبابا عايز أقدم في المعهد العالي للفنون المسرحية، فقالي دول بيكسبوا كام؟ دي مهنة صعبة أوي، وكان الموضوع بالنسبة له غريب، لأن إخواتي كلهم بعيد عن الكارير ده، رغم إن عنده حس قوي في الفن.
وأوضح أن والدته وافقت على دخوله مجال الفن بشرط حصوله على شهادة جامعية أولًا، قائلًا: دخلت كلية تجارة، ودي اللي شكلت شخصيتي، لما بلاقي واحد موهوب ومش واخد فرصة بتعاطف معاه جدًا، لأني كنت عايز أثبت نفسي، وإثبات النفس مش سهل.
كما أشار الفنان إلى أهمية الجانب الإنساني في حياة الفنان، قائلًا: كنت مع أهلي نروح عشان نعرف الناس التانية عايشة إزاي، إحنا بنتكلم في الإنسان، لو سبت شغلك وسلطتك على جنب وعيشت كإنسان هتعيش كويس جدًا، وهتلاقي سعادة إنك تسعد الآخرين ملهاش وصف، خصوصًا إن الكوميديان بيخفف عنك همومك.
وأكد هاني رمزي أن الفنان الكوميدي يحمل دورًا إنسانيًا مهمًا، لأنه يمنح الجمهور مساحة للضحك وتخفيف الضغوط اليومية.
