المتهم بتاع مشاكل والناس حذرتني منه.. ننشر أقوال أحد الشهود في قضية مقتل البلوجر أمير أسمع | خاص
كشفت التحقيقات في قضية المتهم بإنهاء حياة البلوجر أمير أسمع، تفاصيل الواقعة في القضية رقم 8991 لسنة 2025 إداري مصر الجديدة.
المتهم بإنهاء حياة البلوجر أمير أسمع
وحصل القاهرة 24، على نص التحقيقات، حيث جاءت أقوال أحد الشهود في قضية مقتل البلوجر أمير أسمع أمام جهات التحقيق، كالآتي:
س: ما صلتك بالواقعة محل التحقيقات؟
ج: أنا شغال في الكشك اللي كان واقف فيه فرغلي وأمير الله يرحمه واثنين تانين، وشوفته وهو مخبي السكينة عندي.
س: وما هي معلوماتك بشأن الواقعة محل التحقيقات؟
ج: أنا جاي من الصعيد ولسه متخرج من كلية التجارة، وقلت قبل ميعاد الجيش أشتغل شوية، فاشتغلت في الكشك من عشرة أيام قبل الواقعة، وجديد على المنطقة، ولكن الناس في المنطقة كانت بتحذرني من فرغلي، وأنه بلطجي وبتاع مشاكل، وعلى طول معاه سلاح أبيض، وعلى طول دايمًا شايله، فأنا كنت واحد حذرني منه، ومش بتعامل معاه. كبير في المنطقة علشان هو بيجي المنطقة كتير علشان بيسهر في النايت كلاب اللي جنب الكشك، فأنا كنت واخد حذري منه ومش عايز أخش معاه في مشاكل. وفي يوم الواقعة حوالي الساعة 5 أو 5.30 الصبح، لقيته جاي ومعاه اتنين تانيين معرفش أسماءهم، واقفين في الكشك وبيسلم عليهم، ولقيته مطلع سلاح أبيض زي ما تكون سكينة كبيرة أو سنجة، مطلعها وراح جابها عندي ورا الثلاجة، وقالي ساعتها: هسيب دي عندك خمس دقائق وهاجي أخدها، وكان أمير الله يرحمه موجود بعيد، وأنا عرفت إن اسمه أمير من النت. وبعد كده هما قعدوا قدام نايت كلاب، وعدوا الناحية التانية، وسمعت إنه قتل أمير بالمطواة، وده كل اللي أعرفه واللي حصل.
س: متى وأين حدث ذلك تحديدًا؟
ج: الكلام ده حصل يوم 2025/9/24 حوالي الساعة 5:00 الصبح، في شارع حسين المصرفي من شارع أبو بكر الصديق في مصر الجديدة.
س: وما سبب ومناسبة تواجدك بالزمان والمكان آنفي البيان؟
ج: أنا شغال في الكشك اللي جنب النايت كلاب.
س: ومن كان برفقتك آنذاك؟
ج: أنا كنت لوحدي ساعتها.
س: وما طبيعة علاقتك بالمتهم فرغلي؟
ج: أنا أعرفه بحكم إنه زبون بيطلع من النايت كلاب ويشتري مني حاجات، والناس كانت بتناديله يا فرغلي، وده كل علاقتي به.
س: وما في معلوماتك عن المتهم من حيث سلوكه وسماته الشخصية؟
ج: الناس في المنطقة كانت بتحذرني من فرغلي، وأنه بلطجي وبتاع مشاكل، وعلى طول معاه سلاح أبيض، وعلى طول دايمًا شايله، فأنا كنت واخد حذري منه، ومش بتعامل معاه. بيجي كتير في المنطقة علشان بيسهر في النايت كلاب اللي جنب الكشك، فأنا كنت واخد حذري منه ومش عايز أخش معاه في مشاكل.
