مدحت تيخا عن أزمته مع المنتج عوض ماهر: اتعرضت لشتائم واتهاجمت من زميلة عشان طالبت بحقي
كشف الفنان مدحت تيخا تفاصيل تعرضه لهجوم من زميلة له في الوسط الفني، بعد حصوله على حكم ضد المنتج عوض ماهر بالحبس لمدة 6 أشهر على خلفية تحرير شيك بدون رصيد.
مدحت تيخا عن أزمته مع المنتج عوض ماهر: اتعرضت لشتائم واتهاجمت من زميلة عشان طالبت بحقي
وقال مدحت خلال تصريحات لـ القاهرة 24: حق الرد على أزمة الشيك والمنتشرة خلال الأيام دي والنهاردة تحديدًا.. أولًا الشيك ده بقاله تلات سنين، أنا صابر ومستني بقالي تلات سنين عشان أعرف آخد حقي. من شهر اكتشفت إن الشيك مدته هتسقط بعد أيام، فكلمت الأستاذ وقلتله لو سمحت اديني فلوسي، فقال مفيش فلوس كالعادة طبعًا على مدار تلات سنين. قلتله طب جددلي الشيك، اعمله بتاريخ جديد تاني عشان 2026 بدل 2023 عشان أستناك تلات سنين كمان، يبقى أنا كدة مستني ست سنين.. أظن أنا عدّاني العيب وأزح زي ما بيقولوا يعني.
وأضاف: وأنا مكنتش مختار إن أنا أرفع قضية. أولًا أنا أول مرة أرفع قضية في حياتي، أنا عمري ما بعادي حد ولا عمري حتى لو اتنصب عليا بقول فوّضت أمري لله. ولكن أنا لجأت للقضاء عشان أضمن حقي وأضمن فلوسي اللي اشتغلت بيها، فأول ما أنا عملت كدة هو معجبوش، وفجأة أول ما عرف إن أنا رفعت قضية؛ شتايم على الواتساب وأسوأ الألفاظ، عمري ما كنت أتخيل إن عشان بطالب بحقي ألاقي كدة، واللي فُوجئت بيه النهاردة وضايقني أوي النهاردة على مواقع التواصل الاجتماعي، على فيسبوك تحديدًا، إن في زميلة بتهاجمني بأسوأ الصفات وأسوأ الكلام، وأنا لا تربطني بيها أي علاقة لا من قريب ولا من بعيد.
وأردف مدحت تيخا: أنا مش عارف هي بتعمل فيا كدة ليه؟ يمكن عشان بطالب بحقي؟ وبعدين ده حكم محكمة، انتوا بتعترضوا على حكم المحكمة؟ يعني أنا لجأت للقانون، لا أنا مثلًا باخد حقي بأساليب أخرى ببلطجة مثلًا أو بأي حاجة غير قانونية زي ما بيقولوا.. مردتش، مش أخلاقي أصلًا أعمل كدة، أنا لجأت للقانون لإننا في دولة قانون، والحمد لله المحكمة حكمتلي، فـ أنا ده حكم محكمة، أنتم بتعترضوا على حكم المحكمة؟
واستطرد مدحت تيخا حديثه، قائلًا: أنا اخترت أسامح كل اللي شتمني وكل اللي أساء ليا، رغم إن أنا مش عارف، أنتم مفروض زملائي، مش عارف أنتوا بتهاجموني ليه؟ بدل ما تقفوا جنبي بتهاجموني مش عارف ليه. ولكن أنا اخترت إن كل اللي شتمني وكل اللي خاض في عرضي احتسبته عند ربنا. ومسامح حضرتك، ومسامح كل اللي شتمني عندك لوجه الله، خصوصًا لما لقيت صورة حضرتك وعرفت إن حضرتك في سن والدتي.. فـ مسامحك.
كما حرص على توجيه رسالة شكر للفنان أشرف زكي نقيب المهن التمثيلية لمساندته في الأزمة، قائلًا: وبشكر دكتور أشرف زكي لاحتواء الموقف، وبشكر شعبان سعيد محامي النقابة، وحبيت أوجه بس التوضيح ده للسادة الصحفيين ولكل الوسط الفني إن الشيك ده بقاله تلات سنين وكنت مستني تلات سنين كمان بس هو اللي مرضيش، عشان كدة لجأت للقضاء.. شكرًا.
