ملك عمرو لاعبة منتخب الناشئات: لا فرق بيننا وبين أوروبا.. وهدفنا التتويج بكأس العالم في المرة المقبلة| خاص
من قلب بطولة العالم لناشئات كرة اليد في رومانيا، خطفت ملك عمرو الأنظار بأدائها المميز، بعدما قادت منتخب مصر إلى المربع الذهبي واحتلال المركز الرابع عالميًا، قبل أن تتوج بجائزة أفضل ظهير أيمن في البطولة وانضمت إلى التشكيل المثالي للبطولة.
ملك لاعبة منتخب الناشئات لـ القاهرة 24: لا فرق بيننا وبين أوروبا.. وهدفنا التتويج بكأس العالم في المرة المقبلة
وفي حوار خاص لـ القاهرة 24، تكشف ملك كواليس مشوار المنتخب في البطولة، وأصعب مواجهة أمام الدنمارك، وسر الكيمياء بين لاعبات مصر، كما تتحدث عن نادي الزهور، وموقفها من الاحتراف، ورسالة والدتها التي منحتها الثقة قبل مواجهة كبار أوروبا، وطموحها مع المنتخب في البطولات المقبلة.
ألف مبروك يا ملك.. ازاي استقبلتي خبر إعلان حصولك على جائزة أفضل ظهير أيمن في البطولة؟
كانت بالنسبة لي حاجة كبيرة جدًا، وكانت واحدة من الأهداف اللي كنت نفسي أحققها في البطولة، لكن أكيد هدفي الأول إني آخذ كأس العالم مع الفرقة.
ولما حصلت على الجائزة حسيت إني حققت حلم من أحلامي، وده كان بالنسبة لي إنجاز كبير جدًا.
المركز الرابع عالميًا إنجاز كبير.. لكن بعد ضياع الميدالية؟ وإزاي قدرتوا تكملوا؟
زعلنا جدًا بعد الخسارة، لكن كان لازم نلم نفسنا ونكمل عشان ننافس على الميدالية، حسينا إننا ضيعنا ميدالية، لكن كنا عارفين إن ده خير، وإننا عملنا أقصى حاجة عندنا، وقلنا إن شاء الله هنشتغل على نفسنا أكتر في الفترة الجاية، ومش هدفنا ناخد المركز الثالث.. هدفنا المرة الجاية ناخد الأول.
لعبتوا قدام منتخبات قوية زي فرنسا والدنمارك وكرواتيا وإسبانيا.. أنهي ماتش كان الأصعب؟
أصعب ماتش بالنسبة لي كان الدنمارك في مباراة تحديد المركزين الثالث والرابع.
إحنا لعبنا ضدهم قبل كده في دور الثمانية، والفرق الأوروبية لما بتلعب معاها مرتين بتعمل عليك سكاوتنج جامد، وبتكون عارفة طريقة لعبك أكتر.
عشان كده الماتش التاني كان أصعب بكتير، وماكانش عندنا حلول كتير بسبب السكاوتنج الكبير علينا.
ظهر في الفيديو إنك كنتي بتقولي إن الفضل لزميلاتك.. إيه سر التفاهم والكيميا بينكم؟
إحنا بنلعب مع بعض من زمان، وفعلًا بنكمل بعض، كلنا مش فارق معانا مين يجيب الجول أو مين ياخد أفضل لاعبة، إحنا كلنا فريق واحد، وفاهمين إننا هنكسب ببعض، بحماسنا وتعاوننا، وده كان من الأسباب اللي خلتنا نقدر نكسب فرق قوية كتير.
مين اللاعبة اللي بتعتبريها مثلك الأعلى في كرة اليد؟
أكتر لاعبة بحبها هي نورا مورك، لأنها بتلعب في النرويج، وبحبها أوي لأنها شغالة على نفسها.
المدربين دايمًا بيشيدوا بجرأتك.. هل فيه مدرب معين كان ليه دور في إنك تبقي جريئة وماتخافيش من أي حارسة؟
فيه مدربين كتير ساعدوني أكون جريئة، وكانوا بيخلوني أحس إني ما أخافش وألعب وأجرب طول الوقت.
بدأتي كاراتيه وبعدين اتجهتي لكرة اليد وإنتي عندك 7 سنين.. إيه اللي لقيتيه في كرة اليد ومكانش موجود في الكاراتيه؟
الكاراتيه فكانت لعبة فردية، بالنسبة لي ممكن أزهق منها لكن أنا بحب اللعبة الجماعية.
كان عندي صحاب أكتر في كرة اليد، وكانت بتشجعني أكتر إني أروح التمرين وما مغبش. أما اللعبة الفردية فكنت لوحدي، رغم إن عندي صحاب، لكن حسيت برضه إني بلعب في الهاندبول أحسن من الكاراتيه، فقلت أركز في حاجة واحدة، وماكنتش عايزة أشتت نفسي.
نادي الزهور ليه مكانة خاصة عندك.. إيه أكتر حاجة بتميزه؟
بصراحة مش بيبخلوا علينا بحاجة، وبيوفروا لنا كل حاجة في النادي.
إحنا من الفرق اللي بتحقق نتائج كتير، وعشان كده بيكون فيه اهتمام كبير بينا، ودي أكتر حاجة بتميز النادي بالنسبة لي.
قولتي قبل كده إنك مش هتلعبي في مصر غير للزهور.. هل ممكن القرار يتغير لو جالك عرض مناسب؟
أنا بحب النادي جدًا، لكن محدش يعرف الدنيا هتروح فين.
لو فيه عرض كويس جدًا، أكيد هبص لمستقبلي ومصلحتي. حتى لو بحب حاجة قوي، مش هينفع أضيع فرصة كويسة عشاني بحب النادي.
أهديتي الإنجاز لمامتك.. إيه أكتر كلمة قالتها لك قبل البطولة ولسه فاكرها؟
كانت دايمًا بتقول لي: «صدقي بس نفسك، وإنتي هتقدري تحققي كل حاجة».
وكانت بتقول لنا إن ممكن نخاف من رهبة الفرق الأوروبية، لكن لو اقتنعنا بنفسنا ومشفناش فرق بيننا وبينهم، فعلًا مفيش فرق.
إحنا بنتعب وهما كمان بيتعبوا، وفي الآخر لو صدقنا نفسنا هنحقق اللي إحنا عايزينه.
إيه رسالتك لجمهور كرة اليد في مصر اللي بدأ يهتم ويتابع ناشئات اليد؟
اتـبسطنا جدًا لما شوفنا إن فيه ناس كتير مهتمة بالبطولة وبتتابعنا.
طبعًا بنشكرهم على دعمهم ووقوفهم جنبنا، وإن شاء الله هنعمل أكتر وأكتر عشان نفرّح الجماهير ونخليهم دايمًا واثقين فينا.
