إسلام عيسى: حلم كأس العالم راح بسبب الإصابة.. وكنت أتمنى مواجهة الأرجنتين مع منتخب مصر
تحدث إسلام عيسى لاعب منتخب مصر الأول لكرة القدم وسيراميكا كليوباترا عن كواليس تعرضه للإصابة بقطع في الرباط الصليبي خلال ودية الفراعنة أمام إسبانيا.
تصريحات إسلام عيسى
وقال إسلام عيسى في تصريحات عبر قناة أون سبورت مع الإعلامي سيف زاهر: في لحظة واحدة حلم كأس العالم راح بسبب الإصابة ولكن الحمد لله وإن شاء الله أرجع أقوى، وأول ما وقعت وسمعت طقة الركبة قلقت جدًا ووأنا في إسبانيا كان عندي عشم كبير في ربنا إنها متبقاش صليبي ولكن أول ما رجعنا مصر الدكتور أكد لي إنه صليبي ودماغي راحت في حتة تانية ولسة العملية والتأهيل، كنت أتمنى إنها تكون قطع جزئي عشان ألعب كأس العالم ولكن الحمدلله على كل شيء.
وأضاف: بكيت أول ما كابتن حسام حسن جالي المستشفى، هو كان عنده أمل كبير إنها متبقاش صليبي وإني هبقا معاه في كأس العالم ولكن في الأول والآخر ربنا مقدّر كدة ودا نصيبي، وحسام حسن قالي متزعلّش نفسك وأنت لعيب راجل وإن شاء الله لو فيه نصيب هنبقا مع بعض تاني إن شاء الله، وأنا بشكره.
وأشار إسلام عيسى في تصريحاته: كان نفسي أبقا جزء من كأس العالم والفرحة دي والنقطة دي زعلتني شوية، وأكتر مباراة تمنيت إني أكون متواجدًا في الملعب هي مباراة الأرجنتين، ومن جوايا الفرحة كانت كبيرة ولكني في نفس الوقت كنت زعلان لأني كنت عايز أبقا مع زمايلي في المباراة دي، وكنت شايف إننا هنروح لبعيد في كأس العالم، وكنت متوقع لـ زيكو وإمام عاشور وصلاح التألق اللافت في المونديال، وشوبير قدّم بطولة كبيرة للغاية، وكان عندي إحساس إن إمام عاشور هيقدّم بطولة قوية للغاية، وكنت متوقع أن يقدم عمر مرموش بطولة أفضل من كدة، وزيكو كان معاه التوفيق وربنا كرمه، وقدّم أداء جيد في البطولة وكان مفاجأة الجميع.
وأردف: كل اللاعبين تحدثوا معي ودعموني عقب الإصابة، وتريزيجيه مازحني عقب الإصابة قالي انت حسيت إن روحك راحت ورجعت قولتله لأ قالي يبقا مش صليبي.
وأكد إسلام عيسى في تصريحاته: مباراة إسبانيا كانت مختلفة، الأجواء مختلفة، والإحساس مختلف، وأنا بدافع عن منتخب بلدي ومستحيل أبخل بنقطة عرق، وكل اللاعبين كانوا بيعملوا كدة عشان كدة ظهرنا بالصورة المحترمة دي.
