محمد أبو العلا يفتح النار على التحكيم: ركلات جزاء بتتحسب في موقف وما تتحسبش في موقف تاني
تحدث محمد أبو العلا نجم الزمالك السابق، عن الحالات التحكيمية التي شهدتها مباريات الدوري المصري الممتاز خلال الجولتين الأولى والثانية، مطالبًا لجنة الحكام بتقديم توضيحات بشأن بعض القرارات التي أثارت علامات استفهام.
تصريحات محمد أبو العلا نجم الزمالك السابق
وقال أبو العلا خلال تصريحات عبر برنامج زملكاوي المذاع على قناة الزمالك: إحنا لسه في تاني جولة في الدوري، لكن فيه حالات تحكيمية كتير محتاجة توضيح، وفيه قرارات وعلامات استفهام مش مفهومة.
وأضاف: بنحس إن فيه تغاضي في بعض الأوقات عن كروت، وعن حالات طرد، وده محتاج توضيح سريع من لجنة الحكام.
وتابع: الـVAR والمراجعات والإعادات كمان عليهم علامات استفهام، فيه لقطات بتتعاد أكتر من مرة، ومواقف تانية مش بتاخد حقها في الإعادة.
وواصل: إحنا عايزين عدالة وشفافية وتكافؤ فرص، وعايزين نعرف المعيار اللي بيتقاس بيه القرار التحكيمي.
وأوضح أبو العلا: أمور واضحة زي الشمس، ألاقي ركلات جزاء بتتحسب في موقف وما تتحسبش في موقف تاني، وعايز تطرد حد تطرده، وعايز ما تطردوش ما تطردوش.. الموضوع مش مريح.
وأضاف: الضغوط اللي حصلت على التحكيم من الموسم اللي فات والتغييرات اللي حصلت في لجنة الحكام واضح إنها سايبة أثر، وده مخلي الناس عندها تساؤلات كتير.
وواصل: الغريب إن الأندية اللي كنا متعودين منها على البيانات والضغط على التحكيم، دلوقتي مفيش أي مشاكل خالص، وده يخلي الموضوع محتاج علامة استفهام كبيرة.
وأردف نجم الزمالك السابق: الأندية الكبيرة اللي صفقاتها بالمليارات مش محتاجة مساعدات تحكيمية، والمفروض الأمور تبقى واضحة وعلى الجميع.
واختتم محمد أبو العلا تصريحاته برسالة إلى لجنة الحكام، قائلًا: محتاجين توضيحات سريعة، ونفهم المعيار والمقياس، وليه القرار بيتحسب في موقف وما يتحسبش في موقف تاني.
