لاعب مصارعة سابق عن هروب اللاعبين: بدل ما ندور على شماعة اسألوا عن أسباب تكرار الظاهرة
علق محمد مصطفى، لاعب المصارعة السابق، عن أزمة هروب اللاعبين للتجنيس خارج مصر، بعد مغادرة زياد حجاج ومحمد الشامي معسكرين مختلفين.
تصريحات محمد مصطفى
وقال بطل المصارعة السابق: بعيدًا عن العاطفة وتحميل المسؤولية لأي شخص وخلاص، لازم الأمور تتحط في نصابها الصحيح، هروب أي لاعب مش معناه تلقائيًا إن رئيس البعثة هو المسؤول، ومش منطقي إننا نحمله ذنب قرار شخص بالغ قرر يهرب.
وأضاف محمد مصطفى: الكلام عن إن رئيس البعثة كان المفروض يجمع جوازات سفر اللاعبين ويدخل بيها قدام ضابط الجوازات كلام غير منطقي من الأساس. جواز السفر وثيقة شخصية، واللاعب بنفسه بيكون مطالب بإتمام إجراءات السفر والتحقق من هويته، واحتفاظ أي مسؤول بجواز سفر لاعب واستخدامه بدلًا منه قد يضع المسؤول نفسه في مشكلة قانونية كبيرة، خصوصًا لو اللاعب اعترض أو أبلغ السلطات إن جواز سفره محتجز مع شخص آخر.
وتابع بطل المصارعة: بدل ما نسيب أصل المشكلة وندور على أي شخص “يشيل الليلة” عشان نقفل الموضوع ونرضي نفسنا، الأولى نسأل: ليه الظاهرة دي بتتكرر؟، وإيه الأسباب الحقيقية اللي بتخلي لاعب يمثل بلده يوصل لقرار زي ده؟.
واختتم محمد مصطفى تصريحاته: المحاسبة مطلوبة، لكن لازم تكون للشخص المسؤول فعلًا، مش لأقرب شخص موجود في الصورة.
