عمر كاستيلو لـ القاهرة 24: ذهبية البحر المتوسط ليست النهاية.. وحلمنا كأس العالم | حوار
في واحدة من التجارب المهمة في مسيرته، نجح عمر كاستيلو، لاعب الفريق الأول لكرة اليد بالنادي الأهلي ومنتخب مصر، في التتويج بالميدالية الذهبية مع الفراعنة خلال منافسات دورة ألعاب البحر المتوسط.
عمر كاستيلو لـ القاهرة 24: ذهبية البحر المتوسط ليست النهاية.. وحلمنا كأس العالم | حوار
كاستيلو تحدث عن كواليس الإنجاز، وأصعب مباريات البطولة، ومواجهة الجزائر، والنهائي أمام اليونان، في حواره مع القاهرة 24، كما كشف عن طموحاته مع منتخب مصر والأهلي خلال الفترة المقبلة، ورسالته لجماهير القلعة الحمراء، وإلى نص الحوار..
بداية.. صف لنا إحساسك بعد التتويج بذهبية دورة ألعاب البحر المتوسط؟
فخر كبير أوي إننا نرفع علم مصر والنشيد الوطني يتعزف، دي حاجة كبيرة أوي بالنسبة لنا، وإحساس لا يوصف بجد.
وما هي أصعب المباريات في البطولة؟
كل الماتشات ماكنتش سهلة، لكن بالتحديد آخر 3 ماتشات كانوا صعبين جدًا، بداية من ماتش إيطاليا، لأنك بتلعب قدامهم في وسط أرضهم، وكمان كانت آخر فرصة ليهم للصعود، وكان معاهم عدد كبير من لاعبي المنتخب الأول.
وبعدها ماتش الجزائر، وده كان ديربي عربي، وهما كمان كانوا جايين بعدد كبير من لاعبي الفريق الأول، والنهائي كان عليه ضغوطات كتيرة، لأنك عايز تكسب البطولة وترفع علم مصر، وكمان اليونان فرقة محترمة جدًا وكانت جاية بالفريق الأول.
مباراة الجزائر تحديدًا كانت بمثابة بوابة للنهائي.. إزاي حضرتوا لها؟
ماتش الجزائر كان ديربي خاص، وحضرناله كويس جدًا قبل الماتش، وجوه المباراة كان التركيز كله إننا لازم نوصل للنهائي ونكمل المشوار.
هل فاجأكم منتخب اليونان في النهائي بمستواه أو بالاعتماد على عدد كبير من لاعبي الفريق الأول؟
لا، ماتفاجئناش، لأننا اتفرجنا عليهم كتير وكنا عارفين إنهم منتخب قوي، والماتش مش هيبقى سهل، خصوصًا إنهم كانوا جايين بمعظم لاعيبة الفريق الأول.
من وجهة نظرك.. إيه سر قوة منتخب مصر في البطولة؟
سر قوتنا إن معظمنا قريبين من بعض في السن، فكنا على قلب راجل واحد، وكل واحد كان بيعمل دوره، وكلنا كنا بنساعد بعض، وده كان من أهم أسباب نجاحنا.
إنت ومحسن كنتوا من أكبر لاعبي الفريق.. هل حسيت إن عليكم مسؤولية مختلفة؟
أكيد.. أنا كنت أكبر واحد في الفرقة مع محسن، فكان علينا مسؤولية كبيرة في إننا نقود الفرقة وننقل خبراتنا لزمايلنا، والتجربة دي أضافت لنا خبرات كتير نقدر نستفيد منها قدام.
هل تعتبر ذهبية البحر المتوسط نقطة تحول في مسيرتك مع منتخب مصر؟
أنا أتمنى أكمل المشوار، وأتمنى أمثل منتخب مصر في كل البطولات، وأكيد ده هدف كبير بالنسبة لي، وإن شاء الله أقدر أكمل مع المنتخب الفترة الجاية.
المنافسة في المنتخب والأهلي قوية جدًا.. هل بتعتبرها ضغط ولا دافع؟
المنافسة طول الوقت قوية في النادي وفي المنتخب، ودي حلاوتها، وأنا بحاول على قد ما أقدر أكون قد التحدي ده وأثبت نفسي.
بعد ذهبية البحر المتوسط.. إيه حلمك الأكبر مع منتخب مصر؟
نفسي إن شاء الله أكون موجود في كأس العالم، وأحقق ميدالية مع النادي. أنا كسبت حاجات كتيرة مع الأهلي وعملنا مواسم تاريخية، وإن شاء الله نقدر نكمل على ده.
وهل بتفكر في خطوة الاحتراف لو جالك عرض قوي؟
والله اللي ربنا رايده هيكون. لو نصيبي أكون موجود هبقى موجود، ولو مليش نصيب يبقى بالتوفيق للي موجود، وإن شاء الله اللي فيه الخير يقدمه ربنا.
إيه اللي نفسك تحققه مع الأهلي بعد كل البطولات اللي حققتها؟
الأهداف مع الأهلي مبتخلصش، لكن نفسي أعمل موسم تاريخي تالت مع النادي، ويتكتب في تاريخنا، ونقدر نحقق حاجات كبيرة تفضل معانا.
جمهور الأهلي كان داعم ليك.. تحب تقول له إيه؟
بشكر جمهور النادي الأهلي، وبالأخص، على دعمهم ليا بجد في كل موقف، وإنهم دايمًا في ضهري. وبجد أعظم حاجة في الدنيا إن يبقى معاك جمهور الأهلي، جمهور مصر.
وإن شاء الله تفضل كرة اليد مفرحاكم، ودايمًا نشرف مصر.
وفي النهاية.. شايف الفترة الجاية هتكون عاملة إزاي بالنسبة لك؟
يعني سيب الأيام تمشي، وإن شاء الله اللي فيه الخير يقدمه ربنا.
