أزهري: لو دخلك أقل من 10 آلاف جنيه وهتفتح بيت بالإيجار ما تتجوزش دلوقتي
نصح الشيخ الأزهري خليل أمين الشباب بعدم الزواج لمن يقل راتبه عن 10 آلاف جنيه، موضحًا أن من يرغب في فتح بيت بالإيجار ودخله لا يكفي لتغطية تكاليف الإيجار والطعام والعلاج والمواصلات، فإنه غير مستطيع للزواج في الوقت الحالي، قائلًا: يعني لو دخلك أقل من 10 آلاف جنيه وهتفتح بيت بالإيجار ما تتجوزش دلوقتي اللي دخله لا يكفي الإيجار والأكل والعلاج والمواصلات فده غير مستطيع أصلًا.
أزهري: لو دخلك أقل من 10 آلاف جنيه وهتفتح بيت بالإيجار ما تتجوزش دلوقتي
وكتب عبر حسابه على موقع التواصل الاجتماعي فيس بوك: قالولك أتجوز وربنا هيغنيك؟، طب تعرف إن ربنا قال عكس كده؟، قال تعالى: ﴿وَلْيَسْتَعْفِفِ الَّذِينَ لَا يَجِدُونَ نِكَاحًا حَتَّىٰ يُغْنِيَهُمُ اللَّهُ مِنْ فَضْلِهِ﴾، يعني لو دخلك أقل من 10 آلاف جنيه وهتفتح بيت بالإيجار ما تتجوزش دلوقتي، اللي دخله لا يكفي الإيجار والأكل والعلاج والمواصلات فده غير مستطيع أصلًا.
وتابع: وسيدنا النبي ﷺ قال: «مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ وَمَنْ لَمْ يَسْتَطِعْ فَعَلَيْهِ بِالصَّوْمِ»، مش عليه بالزواج وربنا هيغنيه، هتقولي أمال ايه معنى آية: إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ، الفقر اللي القرآن بيتكلم عنه هنا غير عدم الاستطاعة اللي بنتكلم عنها، مردفًا: فقير يعني مستطيع لضروريات الحياة يقدر يفتح بيت بس الدنيا تبقى ضيقة شويةـ وده ينطبق على اللي دخله 10 آلاف جنيه فما فوق لو الشقة إيجار.
وأوضح: أما اللي دخله أقل من كدا يبقى غير مستطيع أصلًا، كدا الآية معناها إيه؟، ما تبصوش لفقر العريس، فالمال ممكن يزيد وممكن ينقص أما اللي لا يملك مؤنة الزواج أصلًا يستعفف حتى يغنيه الله.
وتحدث أمين عن حديث ثلاثةٌ حقٌّ على الله عونهم، قائلا: طب وحديث ثلاثةٌ حقٌّ على الله عونهم.. منهم الناكح الذي يريد العفاف»؟، الحديث صحيح، لكن النبي حدّد أصلًا مين اللي ينكح: مَنِ اسْتَطَاعَ مِنْكُمُ الْبَاءَةَ فَلْيَتَزَوَّجْ، فالناكح الذي يريد العفاف هو الناكح المستطيع للباءة، وعون الله للناكح مش شرط يبقى فلوس ممكن يبقى تيسير وتوفيق وبركة وثبات على العفاف.
وأكمل: طب وحديث التمسوا الرزق بالنكاح؟، حديث ضعيف، وحديث تزوجوا النساء فإنهن يأتينكم بالمال ضعيف، وحديث تزوجوا فقراء يغنكم الله، قال ابن كثير: لا أصل له، وقصة الرجل اللي اشتكى الفقر للنبي ﷺ فأمره يتجوز، لا تثبت برضه.
وأضاف: ربنا يغنيك ويغنيني ويغنينا جميعًا من فضله، بس سيبك من بتوع اللايك والشير، وكل اللي يقول كلام عايم زي اتجوز وربنا هيرزقك، صدقني محدش منهم هييجي آخر الشهر يدفع معاك الإيجار ولا هيشتري الدوا ولا هيصرف معاك على البيت لما مرتبك يخلص، متابعًا: حتى أهلك وأصحابك مهما حبوك.
واختتم: كل واحد فيهم شايل اللي مكفيه، وبالمناسبة أنا مش بخوفك من الجواز ولا بقول استني لحد ما تبقى غني، المهم تكون حاسبها كويس، الإسلام دين عقل وتوكل وأسباب، مش دروشة وتواكل وكلام فاضي.
