هيبة الحنية

مقياس إنسانية أي بني آدم خلقه ربنا بيتمثل في قدر الحنية اللي في قلبه تجاه غيره وتحديدًا تجاه اللي أضعف منه، وتحديدًا أكتر تجاه الحيوانات الأليفة!..

بالمناسبة.. مش شرط عشان تكون متعاطف أو حنين على حيوان أليف إنك تكون من هواة تربيتهم أو تكون بتحبهم.. الحنية طبع بيخرج من القلب بالتصرفات وبدون ما يهمه هو رايح لمين ولا في أي اتجاه..

من 4 سنين جاتلي رسالة من بنت مصرية من الزقازيق بتتكلم فيها عن موقف إنساني نبيل وعلى قد بساطته لكنه ما أخدش حظه من الانتشار، ورغم إنه لو كان حصل بره في أي دولة أجنبية كنا هنهلل وهنقول شوفوا الإنسانية..

"بسنت" بنت مصرية عندها 23 سنة كانت راجعة من شغلها الساعة 11 بالليل.. قبل ما تدخل من الباب سمعت صوت قطة صغيرة عمرها شهرين تلاتة بالكتير محبوسة جاي من البيت اللي جنبهم على طول.. انتظرت شوية يمكن تسكت ماحصلش.. بتقول إنها حست كإن القطة بتستنجد بيها!..

المشكلة إن البيت اللي جنب بيتهم ده لسه في مرحلة البناء وعلى الطوب الأحمر بس أبوابه الخارجية متقفلة فمش هينفع حد يدخله غير من فوق، وكمان أصحابه مش متواجدين..

الفكرة كمان إن "بسنت" معندهاش إخوات ولاد وإخواتها الإتنين بنات بالتالي فكرة إن حد يتجرأ ويحاول يجيب سلم ويفكر ينط مستحيلة!..

طبعًا ممكن تتخيل استغراب واستنكار كتير من الجيران اللي حواليهم لـ وقفة "بسنت" وإخواتها البنات وهما واقفين تحت قلقانين على حتة قطة!..

"بسنت" قالت هتصل بالمطافي!..

طب وإيه علاقتهم يا بنتي وهل أساسًا هيهتموا؟.. ماعرفش بس على الأقل أبقى عملت اللي عليا وماوقفتش مكاني وهما اللي جُم في بالي..

اتصلت فعلًا وقالت للي رد عليها: (بص حضرتك أنا عارفة إنك ممكن تتريق عليا أو تفتكرني بتصل أهزر بس فيه قطة محبوسة في البيت اللي جنبنا ومش عارفين ننقذها)..

الراجل اللي رد طنش؟.. لأ..

قال لها إيه الهبل ده قطة إيه وبتاع إيه؟.. لأ برضه..

قال لها: “طب إهدي يا آنسة”..

ربع ساعة بالظبط وصلت عربية تابعة للحماية المدنية.. وفي خلال ربع ساعة كمان ومن خلال سلم المطافي طلع تلاتة من رجالة الحماية المدنية ونزلوا القطة بأمان..

بس كده؟.. برضه لأ..

شكروها على مكالمتها وبلغوها إن ده جزء من دورهم وواجبهم اللي مش كتير يعرفوا عنه حاجة!..

"بسنت" شافت إن الموقف ده مراية لمجهود قطاع من قطاعات الحكومة ومش متشاف وحبت تبعت القصة عشان المجهود ده يتشاف، بس هي في الحقيقة برضه وبدون ما تقصد كانت بتورينا كمان إنسانيتها هي وإخواتها وحنيتهم اللي أكيد هتكون سبب في إنهم بكره وبعده يبقوا سيدات وأمهات في قمة الرُقي والإنسانية والحنية.

إياك تصدق اللي يقولك إن القسوة والجمود هما اللي بيعملوا قيمة أو هيبة.. بالعكس تمامًا.. القسوة بتعجز صاحبها بدري، وبتخسره حتى نفسه قبل ما تخسره الناس..

البني آدم القاسي ممكن يتخيل إنه كسب جولة بالصوت العالي أو بالشدة، بس في الحقيقة هو بيعيش غريب ومكروه حتى لو حواليه زحمة..

إنما الحنية دي قصة تانية.. الحنية رزق، ومفتاح سحري بيفتح أقفال القلوب من غير استئذان..

القسوة سهلة، أي حد يقدر يبقى قاسي، بس اللي يقدر يفضل حنين وسط دنيا بتعلّم الناس القسوة، ده اللي فعلًا ربنا مديله قلب مختلف بيعيش وبيكمل عشان ببساطة القاسي بيموت وهو عايش، بس الحنين أثره مابيموتش أبدًا.