عمر رزيق: تأثرت نفسيًا خلال تصوير حكاية لعبة جهنم.. وبعتبر نفسي محظوظ بـ "ولنا في الخيال حب" و"القصة الكاملة"
تحدث الفنان عمر رزيق، عن مشاركته في حكاية لعبة جهنم، بطولة الفنان محمد فراج، من سلسلة القصة الكاملة، للمنتج مجدي الهواري، موضحًا أنه تأثر نفسيًا خلال تصوير أحداث العمل.
عمر رزيق: تأثرت نفسيًا خلال تصوير حكاية لعبة جهنم
وقال عمر رزيق، في لقائه مع القاهرة 24: أنا كنت مركز أكتر على القصة والسيناريو، وطبعًا اتفرجت على حلقات سامح سند علشان القصة الكاملة، ومن اسم العمل كان باين أن هيكون في شر.
وأضاف: وأنا بعتبر نفسي محظوظ السنة دي أن كان في حاجتين عكس بعض ولنا في الخيال حب والقصة الكاملة، ومكنتش متخيل خالص الضجة والنجاح اللي حصل ده، وبشكر ربنا على النجاح.
وعن أصعب مشاهده في العمل، فعلق عمر رزيق: مش فتونة ولكن كل المشهد كانت صعبة لأن الحكاية 3 حلقات فقط، وكل المشاهد كانت مكثفة ومضغوطة علشان تعبر على المشكلة، ولكن أكتر مشهد كان صعب هو مشهد المواجهة مع الأب علشان بنفهم منها إيه العقدة اللي خلت الشخصية تعمل كده.
واستكمل: وكمشاهد لما اتفرجت أول مرة كنت متوترة من ناحية أدائي كممثل، وتاني مرة اتفرجت عليه استوعبت ليه الناس متأثرة بالشكل ده وطلع فعلًا صعب نفسيًا، وإحنا عاملين ده علشان نوعي الناس لأن حاجات زي دي بتحصل كتير، وإحنا يوميًا بنشوف حوادث بتحصل فكان لازم نوعي الناس، وتأثرت نفسيًا وقت التصوير، ولكني الحمد لله بفصل.
