هاني سعيد: هدفنا الفوز على جورماهيا الكيني.. وتجاوزنا مرحلة صعوبة اللعب في إفريقيا
أكد هاني سعيد، المدير الرياضي لنادي بيراميدز، أهمية تحقيق نتيجة إيجابية أمام جورماهيا الكيني، في ذهاب دور الـ64 من بطولة دوري أبطال إفريقيا، مشددًا على أن الفوز يمثل الهدف الأساسي للفريق قبل مباراة الإياب.
تصريحات هاني سعيد
وقال هاني سعيد، في تصريحات صحفية قبل مواجهة جورماهيا: إن شاء الله البداية دايمًا مهمة، وبداية البطولة بتفرق معانا وبتدينا دفعة، وإن شاء الله نعمل ماتش كويس يريحنا في ماتش العودة.
وأضاف: عارفين إننا هنلاعب فريق كويس، لكن في الآخر اللي يفرق معايا حالة فرقتي، وده اللي اتكلمت فيه مع اللعيبة، لو حالتنا كويسة وكل واحد في تركيزه، مش هيفرق معايا هنلاعب مين.
وتابع المدير الرياضي لبيراميدز: أتمنى إن اللعيبة تكون في حالة جيدة وتركيز كويس، وإن شاء الله ربنا يكرمنا ونرجع بمكسب.
وعن صعوبة اللعب خارج مصر في البطولات الإفريقية، أوضح هاني سعيد: أجواء اللعب في إفريقيا عامة بتبقى صعبة، لكن بعتقد إن إحنا عدينا المرحلة دي، إحنا بنشارك في البطولة بقالنا سنين، وأعتقد إننا عدينا مرحلة إننا نتكلم عن اللعب بره الأرض.
وأكمل: دلوقتي بنلعب بره أرضنا وهدفنا برضه إننا نكسب، وده الهدف بالنسبة لنا، وإحنا فزنا بالبطولة دي قبل كده، ولما تبقى بطل إفريقيا في سنة من السنين بتبقى المرحلة دي مبتتكلمش فيها خلاص، وإحنا إن شاء الله بنبص لما بعد كده.
وشدد هاني سعيد على ضرورة احترام المنافس والتركيز خلال المباراة، قائلًا: ده مينفيش إن عندنا ماتش صعب ولازم إن شاء الله نركز إننا نعديه.
وتطرق المدير الرياضي لبيراميدز إلى أهمية تحقيق الفوز بعيدًا عن الأداء، مؤكدًا: طبعًا أهم حاجة المكسب أهم من الأداء، ده نمرة واحد.
واختتم تصريحاته قائلًا: يفرق معايا جدًا إن اللعيب يبقى نازل مركز ويطلع كل اللي عنده، مش هتكلم في الناحية الفنية لأن دي بتاعة المدرب، لكن اللي يفرق معايا إني أشوف كل واحد من اللعيبة الموجودين في الملعب بيطلع أقصى حاجة عنده 100%.
وأشار هاني سعيد إلى أن بعض اللاعبين لم يقدموا المستوى المنتظر في مباراة المصري الأخيرة، مؤكدًا أنه يتمنى ظهور جميع اللاعبين بالشكل المعتاد عن بيراميدز أمام جورماهيا، معربًا عن أمله في تحقيق الفوز والعودة بنتيجة إيجابية من كينيا.
