الزعيم يطلب من إسعاد يونس تغيير اسمها فى مكالمة هاتفية
كشفت الفنانة إسعاد يونس عن تفاصيل المكالمة التليفونية التى جرت بينها والزعيم عادل إمام على صفحتها على موقع التواصل الاجتماعى فيس بوك وطالبها فيها بتغيير إسمها، وكانت كتالى:
إسعاد يونس : الموبايل بيرن
ايه النمرة دي؟
ده الأستاذ، و النعمة هو، الزعيم عادل إمام بذات نفسه، يا حلوللي
– آلو، معقولة؟، التليفون نور يا زعيم
– يا إسعاد
– نعم يا أستاذ
عادل إمام: انا عايزك تغيري إسمك
إسعاد يونس: انت تؤمر يا أستاذ يا حبيبي، أخليه إيه؟
عادل إمام: تخليه إسعاد مصر
إسعاد يونس: يارب يخليك يا حبيبي ، ( مخضوضة و صوتي بيحشرج بالعياط )
عادل إمام: بتكلم بجد، انتي ما بقيتيش إسعاد يونس، انتي بقيتي إسعاد مصر
– ( عياط )
– أنا ما بفوتلكيش حلقة يا اسعاد، انتي بتسعديني و بتسعدي مصر كلها
إسعاد يونس: بقية الكلام جميل و رائع و مختلط بدموعي بجد، يا حبيبي يا حبيبي يا حبيبي، مش عارفة اقول حاجة غير كده، و مش عارفة اقول حاجة تاني لحد دلوقتي، كبيره منك يا كبير، ربنا يخليك ليا و يبارك في كل لحظة ف عمرك، بحبه يا ناس حب بحجم موهبته و كاريزمته و صموده و بكل دقيقة من سنين العشرة الطيبة الجميلة.
يذكر أن الزعيم عادل إمام قدم مسلسل بعنوان صاحب السعادة منذ 3 سنوات، تأليف يوسف معاطى وإخراج رامى إمام، ويشاركه البطولة عدد كبير من الفنانين، منهم لبلبة وخالد زكى ونهال عنبر وأحمد عيد وخالد سرحان ولقاء سويدان.
