شادي شامل شبيه “العندليب” يرد على منتقديه: “أنتم بيئة ومن تحت بير السلم” (صورة)
رد الفنان شادي شامل ، المعروف بشبيه “العندليب”، على منتقديه عبر مواقع التواصل الاجتماعي المختلفة.
ونشر شامل على حسابه الشخصي بـ”انستجرام”، عدة صور لفنانين مشاهير تعمدوا تطويل شعرهم، منهم التركي “جان يامان”، و”بوراك أوزجيفيت”، “كيفانش تاتليتوغ” وغيرهم.
وكتب شادي تدوينة طويلة مرفقة مع الصورة فقال:”النسبة البسيطة والقلة القليلة جدا جدا من الناس المعقدة والمريضة اللي عماله تشير صورتي، وأنا شعري طويل وعاملين يقلو في أدبهم ويستخفو دمهم وهم بيض أصلا وأنا أكتر حاجه بكرهها في حياتي هي قله الأدب”.
وأضاف: “أنا لو بواب العمارة أكبر مني في السن بقولوا حضرتك وبحترمه والدي علمني كلمة حضرتك دي مهمة أني أقولها مع الناس عشان يكون في إحترام وأمي علمتني إن ما سمحش حد يتطاول عليا وأسكت”.
وتابع: “المهم لما تيجي تخش علي بروفايل بتاع الناس المريضة دي بتلاقيهم شكلهم غريب واللي بيئة واللي من تحت بير السلم أنا مش بتريق لا سمح الله والله بس الموضوع بقي في سفاله وقله أدب وبدون داعي”.
وأستكمل: “واللي هيقولي أصل احنا في مجتمع شرقي والكلام البطيخ ده هقولو أنت من أول أكلك ولبسك وشربك كله مستورد، أنا مش باخد العادات والتقاليد الخطأ اللي في البلاد الأجنبية وأسوق ليها ساعتها يبقي ليك الحق تقول عاداتنا الشرقية، بلاش تخش معايا في الحتة دي عشان هفحمك بالأدب والذوق وبالدليل”
وأردف:”يا أخي مشفتش مثلا حد بيتكلم أني بمثل مصر في دول أوروبا وباخد جوائز لما بعزف علي العود في كذا دار أوبرا في العالم ومن الصعب أن حد عربي يدخل وسط الأجانب وفي الاخر يقولك أصل شعره أصل دقنه أيه الهيافة والتفاهة دي ..ده أنا شغال علي أغنية بقالي ست شهور وبسافر كذا بلد عشان أجيب عازفين من بره عشان أقدم أغنية حلوة عشان بحترمكم”
وتابع: “علي فكرة أنا مش عايز أرضي حد أنا عايز نحترم بعض نتفق باحترام نختلف باحترام ..وبعدين تعالي هنا أنا راجل معظم وقتي عايش بره ممكن أكون غصب عني أتاثرت بطريقه اللبس والاستايل ودي حاجه ما تعبنيش”.
وأضاف:”ممكن تقول رأيك بكل أدب واحترام.. فعلا ما بقاش في تربية ولا رقي ولا ثقافة للأسف ما تلاقيش الكلام ده غير في مصر، أنا ما بقصدش كل المصريين أنا بقصد قليل الأدب، أما النسبة العالية من الناس المحترمة المؤدبة اللي دايما واقفين معايا أشيلهم فوق رأسي من فوق لحد ما ضهري يتكسر ..يا خساره بحد يا خسارة”.
وأختتم: “عيب عيب ده انا ابن بلدكم بزعل والله لما بلاقي تقدير في دول أوروبا والدول العربية المحترمه وقلة ونسبة بسيطة جدا من أولاد بلدي يتطاولو كده، ليه يا جبناء مش بتتكلمو علي ممثلين والمطربين بتوع بره يا معقدين والله العظيم انتو صعابنين عليا أنتم مرضي وفشلة ومش أسوياء ومحتاجين علاج نفسي قوي والحقد والغل والكراهية ماليين قلوبكم (في قلوبهم مرض فزادهم الله مرضا ولهم عذاب أليم بما كانوا يكذبون) صدق الله العظيم، هنيئا لكم سئياتكم وهنيئا لي من مقدار الحسنات من قله أدبكم”.
