معرض القاهرة الدولي للكتاب 2020.. أسباب تدفعك لزيارة جناح الهيئة العامة للكتاب (صور)
نشرت الصفحة الرسمية لمعرض القاهرة الدولي للكتاب أسبابًا جديدة لتحفيز القراء لزيارته، وذلك بأهم الإصدارات التي تنشرها الهيئة العامة للكتاب، وكان من أهمها:
1) أسعار الكتب في جناح الهيئة المصرية العامة للكتاب رخيصة ومدعمة وبالتالي تقدر بميزانيتك تجيب عدد كبير من الكتب في المجالات اللي انت بتحبها.
2) لما تبدأ زيارتك من جناح الهيئة هتجيب كل الكتب اللي انت عايزها بأسعار كويسة فتقدر تحدد انت هتجيب ايه بعد كده بدل ما تجيب كتب غالية وبعدين تكتشف إنها موجودة في جناح الهيئة بأسعار أرخص بكتير.
3) تنوع مجالات الكتب في إصدارات الهيئة وبالتالي أيا كانت اهتماماتك هتلاقي كتب كتير في المجال ده، هتلاقي كتب في التاريخ وكتب شعر وكتب عن الفن والمسرح وكتب في علم النفس ومجلات وكتب للأطفال وكل ده بأسعار مغرية جدًا
4) في إصدارات حديثة مدعمة السنة دي مهم جدًا تقتنيها زي مجموعة ” شخصية مصر ” لجمال حمدان، وسلسلة ما في علم النفس والموسيقى وغيرها من الإصدارات الحديثة هتلاقيها في ركن الإصدارات الحديثة.
5) هنرشحلكم مجموعة من الأعمال لكن لما تزور جناح الهيئة المصرية العامة للكتاب وتاخد جولة هتلاقي أعمال أكتر بكتير ومتنوعة … مثلًا:
هتلاقي الأعمال الكاملة للشعراء الكبار عبد الرحمن الأبنودي وصلاح جاهين وفؤاد حداد وبيرم التونسي وغيرهم
وهتلاقي الأعمال الكاملة للروائي الكبير جمال الغيطاني وأعمال شخصية المعرض جمال حمدان غير مجموعة شخصية مصر وطبعًا موسوعة وصف مصر التاريخية وكتاب الأغاني للأصفهاني وهتلاقي مؤلفات الكاتب عبد الرحمن الشرقاوي.
وبالنسبة لكتب الأطفال، هتلاقي ركن خاص بكتب الأطفال بأسعار رائعة جدًا، فيه إصدارات حديثة يعني هتقدر تجيب مجموعة كبيرة من الكتب لأطفالك وبأسعار حلوة.
