مواطن يحرر محضر ضد مطعم سمسمة بسبب “مسمار” داخل ساندوتش (صور)

حرر أحد سكان مدينة الشيخ زايد، محضرًا في مطعم “سمسمة” بمدينة الشيخ زايد، بعد اكتشافة وجود مسمار في ساندوتش وعند عودته لمعاتبة المطعم فوجيء بعدم اعتراف المطعم بأن المسمار منهم، علاوة على التعامل غير اللائق مع العميل.

وقال العميل في منشور تحذيري عبر صفحته الشخصية على ” فيس بوك” قائلاً:” امبارح حصل موقف في مطعم سمسمة الشيخ زايد، وانا باكل وبحمد ربنا انه عدى على خير وأخدت بالى قبل ما يجرالى حاجة، طلبت سندوتشات شاورما كيزر من الفرع كالعادة، وبناكل وتمام مفيش أى حاجة، وفجأة لقيت “مسمار” داخل الساندوتش الى كنت باكل واللى كنت خلاص هبلعه وربنا سترها”.

وتابع قائلاً: “روحت ألوم على اللي شغالين في المطعم، وان إزاى مطعم مشهور زيهم كدا يحصل فيه كدا، ولا قدر الله لو كان الساندوتش دا كان وقع في أيد طفل، كان ساعتها هيبقي ايه الوضع؟، إذ فجأة ألاقي هجوم غير مبرر من اللي واقف على الكاشير، قولتله ممكن أقابل المدير، وبالفعل جه مدير المطعم الى قلت خلاص هيتفهم الوضع ويقرر يعاقب المسئول عن الإهمال دا، واللى حصل عكس كدا تماما.

وأضاف قائلاً:”وقرر المدير يمشي على نفس نهج الموظف وينفي وجود المسمار وبيقولي أن المسمار مش من عندهم؟، طب حضرتك إزاى يعني وأنا هرمي اتهامات عليكم ليه طيب؟ وكان رده أعمل الى عندك.

وختم قائلاً:”قررت أروح قسم الشيخ زايد، علشان أحرر محضر بالواقعة دي وبالفعل عملت محضر برقم 202/605، وقررت اني مش هسيب حقي طبعا، لأن لا قدر الله الموقف دا ممكن يحصل مع أي حد بياكل من المطعم دا، وبالذات لو طفل مثلا كان هيبقي الوضع مش لطيف تماما، انا عملت كل دا بس علشان أعرف الناس أن المطعم دا غير أمين بالمرة انك تاكل عنده، دا غير تعامل المدير والموظفين بالشكل دا مع الزباين، انا مكمل لحد ما أشوف أخر الأهمال دا إيه والناس المسئولة عن دا تتعاقب”.