أول مطعم سوشى فى الأقاليم.. “SOY SUSHI” يلقى رواجاً بالزقازيق (صور)
تداول عدد من مستخدمي موقع التواصل الإجتماعي فيس بوك تدوينة نشرها تامر عبد الحميد عن نجاح فكرة أخوتة في أفتتاح مطعم سوشي بمدينة الزقازيق.
وسرد تامر في تدوينته له على صفحتة الشخصية بـ”فيس بوك”، قصة كفاح أخوته بمساعدة ودعم والدهم، في أفتتاح مطعم “soy sushi” بمدينة الزقازيق وهي منطقة تعتبر ريفية، مما أثار سخرية معظم الأشخاص على فكرة أفتتاح مطعم سوشي.
وينقل لكم “القاهرة24” تفاصيل رحلة نجاح المطعم وأراء الزبائن بعد ما أفتتح المطعم، من خلال تدوينة “تامر” التالية:-
“اخواتي الاتنين أحمد وعبد الله، سافروا كتير جوَّه وبرَّه مصر، تعبوا واتغربوا واتعلموا، وقرروا يرجعوا هنا ويعملوا حاجة.
عبد الله ومراته سارة عملوا مشروع سوشي من البيت، يجهزوا أوردرات ويوصلوها للناس في بيوتها، الكلام ده فين؟ في الزقازيق.
من يومين، عبد الله وسارة وأحمد ومراته إليونا، وبدعم من بابا، افتتحوا أول مطعم سوشي في الزقازيق، مطعم SOY SUSHI 
.
قبل الافتتاح الناس اتريقت كتير، وحقهم بصراحة، الفكرة جريئة بدرجة كفاية إنها تبقى أقرب للنكتة، لكن هما كانوا مصرِّين يثبتوا لنفسهم الأول وللي حواليهم إن الموضوع بجد، وكويس.
أعظم حاجة بالنسبالي إنهم وقفوا يشتغلوا هما الأربعة بنفسهم في المطعم، همَّا اللي بياخدوا الأوردرات وبينزِّلوا الأكل وبيحاسبوا الزباين.
دي آراء الناس اللي راحت أول يومين، اليومين اللي المطعم فيهم كان كامل العدد طول الوقت، والناس بتستنى برَّه لحد ما يفضى مكان.
أنا فخور بأفراد أسرتي، وبطموحهم وإصرارهم.. ونجاحهم، لإنهم بيوصَّلوا رسالة مهمة: مش مهم بس تفكَّر برَّة الصندوق، المهم كمان تحوِّل فكرتك دي لحاجة ملموسة، وتبذل أقصى مجهود ممكن تبذله، ويبقى ليك ساعتها صندوق مخصوص بإسمك، يمكن ناس غيرك تبدأ تفكَّر جواه”.
