ريهام حجاج تثير الجدل على السوشال ميديا بعد تعليقها: “أنا متصورة مع جوزي مش عشيقي” (صور)

أثارت الفنانة ريهام حجاج ، الجدل عبر مواقع التواصل الاجتماعي، بسبب الصورة التي نشرتها مع زوجها رجل الأعمال محمد حلاوة، وطليق الفنانة ياسمين عبد العزيز سابقًا، حيث كان هدفها من الصورة هو نصح الجمهور بالتزام المنازل، ولكن المتابعين أعادوا بها للقصة القديمة ووصفها البعض بـ”خطافة الرجالة”، ولاقت الصورة العديد من الانتقادات.

وخرجت ريهام حجاج عن صمتها وكتبت تعليق لترد به على الانتقادات، ووجهت رسالة ساخطة على اللجان الإلكترونية، حيث كتبت: “أنا شايفة أنكم بقالكوا كتير أوي بتحكوا في المحكي، ما زهقتوش، كلكم علي بعض 170 كومنت تلت ترباعكم لجان إلكترونية و في الربع التاني حافظ و بيردد كلام”.

وأضافت: “أنا بقالي سنتين متجوزة وقربت أخلف وأنتم مع كل صورة بنزلها مع جوزي نفس الأشخاص بنفس التعليقات، عمومًا أنا متصورة مع جوزي مش عشيقي”.

وقالت: “أنا حرة و مابعملش حاجة غلط و مش عشان أي سبب غير إني حابة الصورة وحابة أشاركها مع كل الناس السوية مش المريضة.. اللي بيحبوني وبيبعتولي تعليقات جميلة ولطيفة، وعلي الانستجرام بتاعي أنزل عليه اللي أنا عايزه بتتكلموا في موضوع يضحك أساسًا”.

أعمال ريهام حجاج

وتابع ريهام حجاج: “يعني ماعتقدش إني ممكن اختار لواحدة فيكم جوزها مثلًا، و لا حتي أقول رأيي فيه، مش من حقي فأكيد مش من حقكم يعني هو مش موضوع يحتمل النقاش أساسًا عمالين بتهروا في موضوع صاحبة الشأن نفسها طلعت في برنامج و اتكلمت عن طلاقها اللي كان من سنة قبل جوازي”.

واختتمت ريهام تعليقها الأول قائلًة: “بتخترعوا قصص وهمية ومصدقنها زي مثلا اننا كنا اعز اصحاب وكلام غريب وأنتم ماتعرفوناش أصلا الجواز والطلاق دا نصيب وحلال مش حاتحرموا حلال ربنا يعني.. ولا هو التدين بيطلع وقت ما نحب».

وكتبت في تعليق أخر: “هو الكلام اللي بيتكتب دا ليه علاقة.. بالدين ولا الأخلاق، لا مسلمة و لا مسيحية و لا يهودية ولا حتي بوذية عندها أخلاق ممكن يطلع منها كلام زي دا لمجرد إنها مستخبية ورا موبايل.. ربنا يهدي صحاب النفسيات الجحيم اللي قاعدين يشتموا علي السوشيال ميديا، أي و كل حد وينظر و يحكم علي حياه بني آدمين مايعرفهمش”.

ريهام حجاج تنشر صورة رفقة زوجها داخل المنزل بسبب فيروس كورونا